აშშ-ის სახელმწიფო დეპარტამენტის წარმომადგენელმა ჯენ პსაკიმ სასაცილო უწოდა ლავროვის ბრალდებებს აშშ-ის მისამართით იმის შესახებ, რომ ამერიკელები კიევის ხელისუფლებას აკონტროლებენ.

მისი თქმით, უკრაინა - ეს სუვერენული სახელმწიფოა, რომელიც უფლებამოსილია თავის ტერიტორიაზე საკუთარი უსაფრთხოების დაცვისათვის ოპერაციები ჩაატაროს. რუსეთის ფედერაციის საგარეო საქმეთა სამინისტროს ასეთი რიტორიკა „კონტრპროდუქტიულია“.

პსაკიმ ასევე მოითხოვა დაუყოვნებლივ გაათავისუფლონ უკრაინის აღმოსავლეთში დაკავებული ამერიკელი ჟურნალისტი, გამოცემა Vice News-ის კორესპონდენტი სიმონ ოსტროვსკი.

შეგახსენებთ, რომ სერგეი ლავროვმა კვლავ განაცხადა, რომ უკრაინის ტერიტორიაზე რუსი სამხედროები არ არიან და აშშ-ს დაძრახა ფალსიფიცირებული ფოტოსურათების დახმარებით საწინააღმდეგოს დამტკიცების მცდელობების გამო.

„ერთადერთი კონკრეტული მტკიცებულება, რომელიც ამერიკელებს აქვთ, ყველგან ფალსიფიცირებული ფოტოსურათების გავრცელების გარდა, არის ფაქტი, რომ სამხედროები იყენებენ რუსულ იარაღს. მაგრამ რუსულ იარაღს ყველა იყენებს - და უკრაინაშიც ასეა („კალაშნიკოვი“, „მაკაროვი“, პისტოლეტები)“, - განაცხადა ლავროვმა ტელეარხ „რუსეთი დღეს“ ეთერში.

მან ასევე თქვა, რომ უკრაინაში საპრეზიდენტო არჩევნების ჩატარება ქვეყნის „დამანგრეველ“ მომენტად იქცევა, თუ კიევი არ გაითვალისწინებს სამხრეთ-აღმოსავლეთ რეგიონების მოსახლეობის მოთხოვნებს. რუსული საგარეო უწყების მეთაურმა ვაშინგტონს ბრალი დასდო, რომ ის „დირიჟორობს შოუს“ უკრაინაში.

მოამზადა ლევან ებრალიძემ.