თურქეთის პრემიერ-მინისტრმა რეჯეფ ტაიპ ერდოღანმა, პირველი მსოფლიო ომის დროს, ოსმალეთის იმპერიის ჯარისკაცების მიერ დახოცილი სომხების შთამომავლებისადმი სინანული პირველად გამოთქვა. 23 აპრილს გამოქვეყნებულ ოფიციალურ განცხადებაში, თურქეთის მთავრობის მეთაურმა 1915 წლის მოვლენებს „არაადამიანური“ უწოდა.

როგორც სააგენტო Reuters თურქეთის ხელისუფლების ერთ-ერთ წარმომადგენელზე დაყრდნობით წერს, ეს პირველი შემთხვევაა, როდესაც თურქეთის პრემიერ-მინისტრი „ასე გულწრფელ სინანულს“ გამოხატავს. „ჩვენ ვისურვებდით, რომ ХХ საუკუნის დასაწყისის მოვლენებში დაღუპული სომხების სულები მშვიდობით განისვენებდნენ, ხოლო მათ შვილიშვილებს ჩვენ სინანულს ვუთვლით“, - განაცხადა ერდოღანმა, და ამავდროულად, სომხებისა და თურქების „მსგავს ჩვეულებებსა და ტრადიციებზე“ მიუთითა.

გარდა ამისა, ერდოღანმა იმედი გამოთქვა, რომ ორივე ერი „შეძლებს ერთად და ღირსეულად გაიხსენონ თავისი წარსული და დანაკარგები“. მან ასევე მოუწოდა ერთად შეისწავლონ ისტორიული მოვლენები, მათ „პოლიტიკურ ინსტრუმენტებად“ გადაქცევის გარეშე.

სააგენტო Reuters აღნიშნავს,რომ თურქი პრემიერის განცხადება მოულოდნელი იყო და უფრო შემრიგებლურ ტონალობაში ჟღერდა, ვიდრე ამ თემაზე სხვა მაღალჩინოსანი თურქი პოლიტიკოსების გამოსვლები.

მოამზადა ლევან ებრალიძემ.