ექსპერტი: "არჩევნებზე ამომრჩევლის ძალიან დაბალი დასწრება დაფიქსირდება"

სამართალი - 11:21, 23 Apr, 2014

1668

ექსპერტი ხათუნა ლაგაზიძე ქვეყანაში მოახლოებულ არჩევნებზე საუბრობს და მიმდინარე მოვლენებს აფასებს.

„რეალურად თუ ვიმსჯელებთ, ხელისუფლებას დღეს არჩევის პრობლემა არ აქვს, უბრალოდ ის თვითმმართველობის არჩევნებზე ამომრჩევლის გამოყვანას ცდილობს, რადგან წინააღმდეგ შემთხვევაში, მეორე ტურის ალბათობა იზრდება. მმართველმა გუნდმა ისიც კარგად იცის, რომ „ნაციონალურ მოძრაობას“ საკმაოდ კარგად ორგანიზებული ამომრჩეველი ჰყავს. თვითმმართველობის არჩევნებზე ამომრჩევლის ძალიან დაბალი დასწრება დაფიქსირდება, რაც ხელისუფლებას ლეგიტიმაციის პრობლემას შეუქმნის. ამ ფონზე, განსაკუთრებით დასავლეთის თვალში, მორატორიუმის გამოცხადება დადებითი ნაბიჯია, მაგრამ „ნაციონალური მოძრაობის“ წინააღმდეგ რეგიონებში გამართული საპრტესტო აქციები საკმაოდ შემაშფოთებელ სიგნალებს გვაძლევს. ეს ხელისუფლების ხელწერად არ უნდა იქცეს.

თქვენი შთაბეჭდილება როგორია, „ნაციონალურ მოძრაობას“ რეგიონებში „ქართული ოცნების“ დაკვეთით დაუპირისპირდნენ, ხელისუფლება ამტკიცებს, რომ წინასაარჩევნოდ ამ ფორმით დაძაბული პოლიტიკური ვითარების შექმნა მხოლოდ „ნაციონალური მოძრაობას“ აწყობდაო?

ფაქტია, „ნაციონალური მოძრაობის" წინააღმდეგ ამ ხალხს ვიღაც მართავდა. წინააღმდეგ შემთხვევაში, რამდენიმე რაიონში ერთდროულად შეკრება და კვერცხების სროლა თავში არავის მოუვიდოდა. ეს ხელისუფლებამ დაგეგმა თუ არა, ამის თქმა რთულია, მაგრამ პასუხისმგებლობა სწორედ მას ეკისრება. როცა ადამიანს თავისივე მეთოდებით უპირისპირდები, შენც მისნაირი ხდება.

„ნაციონალურმა მოძრაობამ“ ხელისუფლებაში ყოფნისას საფრთხე პირველ რიგში საკუთარ მომავალს შეუქმნა. დღეს მათ რაც არ უნდა დააბრალონ ხალხი მარტივად იჯერებს. 9 წლის განმავლობაში მათ მმართველობას იმდენად არაადამიანური ხელწერა ჰქონდათ, რომ ახლა „ქართულ ოცნებას“ შეუძლია „ნაციონალებს“ ყველაფერი დააბრალოს და ხელიც მაქსიმალურდ შეიწმინდოს. თანაც ისე, რომ ცოტას გაუჩნდება კითხვა, რომელი პოლიტიკური ძალა ესვრის საკუთარ თავს კვერცხებს?! ამ შემთხვევაში სხვა პოლიტიკურ ძალაზე რომ ვსაუბრობდეთ, „ქართული ოცნება“ ვერავის დააჯერებდა, რომ პოლიტიკოსებმა საკუთარ თავს კვერცხები დაუშინეს.