ლალი მოროშკინა: პატიმრები აცხადებენ, რომ ისინი გვერდში ედგნენ ახალ მთავრობას

სამართალი - 16:47, 07 Dec, 2012

943

,,ამნისტიასთან დაკავშირებით, პატიმრების მოლოდინი ძალიან დიდი იყო, მაგრამ როგორც ვხედავთ, მისი მასშტაბები შეკვეცილ იქნა. სასჯელაღსრულების მინისტრს არაერთხელ დაფიქსირებია თავისი პოზიცია, რომ ამნისტია იმდენად დიდი გამოსავალი არაა, ვიდრე სასჯელის შეკრებითობის პრინციპის გაუქმება და მისი შთანთქმის პრინციპით ჩანაცვლება. აუცილებელია, რომ ეს პროცესი არ გაიწელოს და შეკრებითობის პრინციპი მალე გაუქმდეს, წინააღმდეგ შემთხვევაში, ძალიან მძიმე შედეგებს მივიღებთ. კიდევ ერთხელ ვაფიქსირებ, ციხეებში პატიმრები გაფაციცებით უსმენენ რადიოს და ტელევიზორს. ისინი ითხოვენ დაპირების შესრულებას. როგორც ცნობილია, "ქართული ოცნების" ერთ-ერთი მთავარი დაპირება სწორედ ამ პრინციპის გაუქმება იყო. ამდენად, მათი მოლოდინი და მოთხოვნა უსაფუძვლო არ არის. განსაკუთრებით მინდა, აღვნიშნო ის ფაქტი, რომ ძალიან ბევრმა პატიმარმა საკუთარი მოქალაქეობრივი პოზიცია დააფიქსირა, როდესაც ციხეში ბუნტებს და არეულობას არ აჰყვნენ და აცხადებდნენ, რომ ისინი გვერდში ედგნენ ახალ მთავრობას და მათი იმედი ჰქონდათ. ამდენად, მოლოდინის რეჟიმი არის ძალიან მძიმე და თუ საპარლამენტო უმრავლესობა ,,ნაციონალების" უზნეო განცხადებებს არ აჰყვება, კარგ შედეგს მივიღებთ", - განაცხადა მოროშკინამ.

,,მე ძალიან ნაკლებად ვეჭვობ, რომ ქვეყანაში კრიმინოგენური მდგომარეობა გართულდეს. მე მჯერა ღარიბაშვილის და მისი გუნდის პროფესიონალიზმის. ამნისტია უნდა შეეხოს რაც შეიძლება მეტ პატიმარს. ამ შემთხვევაში ვსაუბრობ, როგორც შიგნით, მათთან მყოფი ადამიანი. პატიმრებს ახლა შველა სჭირდებათ. ძალიან ბევრი ისეა დაავადმყოფებული, რომ ეტლით დადის, ფეხზე ვერ დგება. გასაგებია, რომ გარკვეულმა ნაწილმა მართლა ჩაიდინა დანაშაული, მაგრამ მათ ის დანაშაული საკუთარი სისხლით უკვე ათასჯერ გამოისყიდეს", - აღნიშნა მოროშკინამ.

ლალი მოროშკინა მიიჩნევს, რომ იმ ყველა პატიმარს კიდევ ერთი შანსი უნდა მისცენ.

,,ადამიანებმა, რომლებიც ციხეში მოხვდნენ გარკვეული დანაშაულის ჩადენის გამო, გამოიარეს სრული ჯოჯოხეთი და ყველას კიდევ ერთი შანსი უნდა მივცეთ. როცა საზოგადოებაში საუბრობენ იმაზე, რომ განზრახ დანაშაულის ჩამდენებს ამნისტია არ უნდა შეეხოთ და ისინი საზოგადოებისთვის საშიშები არიან, სურვილი მიჩნდება, ისინი წავიყვანო ციხეში და ვაჩვენო როგორ მდგომარეობაში არიან პატიმრები", - განაცხადა მოროშკინამ.