თბილისის საქალაქო სასამართლომ ემზარ კვიციანს პატიმრობის ვადა ერთი თვით, 28 მაისამდე გაუგრძელა.

გადაწყვეტილების გამოცხადებამდე კვიციანის ადვოკატებმა სასამართლოში განაცხადი წარადგინეს, რომელსაც ხელს აწერს საპარლამენტო უმრავლესობის 35 დეპუტატი. განაცხადით მოთხოვნილი იყო, რომ კვიციანი გაეთავისუფლებინათ პატიმრობიდან. განაცხადში მითითებული იყო, რომ ემზარ კვიციანი წინა ხელისუფლების პოლიტიკური დევნილი იყო.

როგორც სხდომაზე პროკურორმა განაცხადა, აღნიშნული ხელმოწერები არა სასამართლოსთვის, არამედ პროკურატურისთვის იყო გაგზავნილი.

დღევანდელ პროცესზე ემზარ კვიციანმაც გააკეთა განცხადება.

მისი თქმით, ყველაფერი გააკეთა იმისათვის, რომ რუსეთიდან გამოეძევებინათ, საქართველოში დაბრუნებულიყო და სიმართლე გაერკვია.

"რუსეთიდანაც ძალით გამოვაძევებინე თავი, აქ რომ ჩამოვსულიყავი. სად გამქცევი ვარ, რუსეთში 5 წელი ფეხს ვეღარ შევდგამ. ჩამოვედი იმისთვის, რომ სიმართლე გამერკვია. ჩემს წინააღმდეგ ყველა საქმე შეთითხნილია, მეგონა, რომ პროკურატურა ამ ხნის განმავლობაში გამოიძიებდა და რაიმე სიმართლეს მიაკვლევდა, სწორედ ამიტომ არ ვიღებდი ხმას. თუმცა ასე არ მოხდა", - განაცხადა ემზარ კვიციანმა.

კვიციანი ბრალად წარდგენილი აქვს გადატრიალების მცდელობა, შეიარაღებული ბანდფორმირებების შექმნა და იარაღის უკანონო შეძენა-შენახვა-ტარება.