აშშ-ის პრეზიდენტმა ბარაკ ობამამ, ხუთშაბათს საღამოს, უკრაინის აღმოსავლეთის სიტუაცია გერმანიის კანცლერ ანგელა მერკელთან და დიდი ბრიტანეთის პრემიერ-მინისტრთან დევიდ კემერონთან განიხილა.

ამის შესახებ თეთრი სახლის პრეს-სამსახური იუწყება. მიუხედავად იმისა, რომ ჟენევაში ოთხმხრივი მოლაპარაკებების შედეგად მიიღეს რეზოლუცია უკრაინაში „დაძაბულობის დეესკალაციის“ შესახებ, აშშ-სა და გერმანიის ლიდერები სიტუაციით ისევ „ღრმად შეშფოთებული“ არიან. ხოლო ობამას კემერონთან საუბრის შემდეგ ცნობილი გახდა, რომ დიდი ბრიტანეთი უკრაინაში ეუთოს მისიის მხარდასაჭერად 1 მილიონ ფუნტ სტერლინგს გამოყოფს.

აშშ-ის პრეზიდენტი და გერმანიის კანცლერი შეთანხმდნენ, რომ შეერთებული შტატები და ევროპა მზად არიან მიიღონ შემდგომი ზომები, თუ უახლოეს დროში არ მოხდება დეესკალაცია.

ობამამ, საღამოს, ბრიფინგზე განაცხადა, რომ რუსეთის უკრაინისადმი მოპყრობა იძულებულს ხდის მის მიერ ჟენევის მოლაპარაკებების შესრულების მიმართ სკეპტიციზმით შეხედოს:

„იმედი მაქვს, რომ მოლაპარაკებების შესრულებას ვნახავთ, მაგრამ რუსეთის მანამდელი ქცევიდან გამომდინარე, ჩემი აზრით, ამაზე დაყრდნობა არ შეიძლება. ჩვენ მზად უნდა ვიყოთ საპასუხოდ რუსეთის მხრიდან უკრაინის სამხრეთ და აღმოსავლეთ ნაწილებში ჩარევის მცდელობებზე“.

„ჩვენ უკვე მოვახდინეთ ზეგავლენა რუსულ ეკონომიკაზე, და სიტუაცია შესაძლოა გაცილებით გაუარესდეს. მაგრამ არ ვართ დაინტერესებული, რომ უბრალო რუსებს ზიანი მივაყენოთ“, ვაშინგტონი რუსეთის შესახებ იმსჯელებს მისი საქმეებით და არა სიტყვებით, თქვა ობამამ.

რადიო თავისუფლების მასალებზე, მოამზადა ლევან ებრალიძემ.