შარაშენიძე: პუტინისგან იმის თქმა რომ არ ეშინიათ, სწორედ იმის დადასტურებაა, რომ ეშინიათ

პოზიცია - 20:31, 17 Apr, 2014

3575

ექსპერტმა თორნიკე შარაშენიძემ პუტინის განცხადებებს არალოგიკური უწოდა. შარაშენიძის განმარტებით, რუსეთი აქამდე სულ აფიქსირებდა პოზიციას და ამბობდა, რომ ნატოს გაფართოება მათთვის პრობლემა იყო. დღევანდელ პრესკონფერენციაზე კი განაცხადა, რომ რუსეთს ნატოს გაფართოების არ ეშინია.

"ახლა უბრალოდ აფიქსირებენ თავიანთ პოზიციას, რომ ჩვენ ძლიერები ვართ... გავფართოვდით, ჩვენი ტერიტორიები შემოვიერთეთ, რა თქმა უნდა მათ ეშინიათ, ეს დაადასტურა ისტერიულმა გამოსვლამ, რომელიც ჰქონდა კისილიოვს, ვაი გვახრჩობენ და ვაი გვგუდავენ და ა. შ. ის ლაპარაკი რომ არ ეშინიათ, სწორედ იმის დადასტურებაა, რომ ეშინიათ", - აღნიშნა "ნიუპოსტთან" საუბისას ექსპერტმა.

შარაშენიძე მიიჩნევს, რომ ნატო ადეკვატურ ზომებს იღებს და აქვს სწორი და სათანადო პასუხები რუსეთის ქმედებაზე.

"რუსეთს აქვს პანიკური შიში, რომ ოდესღაც დაიშლება, აქვს შიში, რომ იგი ვითარდება არასწორი გზით, ამას აცნობიერებს ძალიან კარგად და დრო მუშაობს მათ წინააღმდეგ, ეს ფაფხური და ბოლო დროინდელი ქმედებებირომელიც ანგრევს საერთაშორისო უსაფრთხოების სისტემას, მიმართულია იმისკენ , რომ როგორღაც გააჩერონ ეს პროცესი და რაც შეიძლება ბევრი ტერიტორია დაიპყრონ, რომ ამით შიგნიდან თავიანთი დაშლა შეაჩერონ, მათი საქციელის ასეთი ახსნა არის ეს რომ მათ ელემენტარულად ეშინიათ, რომ მათი ქვეყანა დაინგრევა, იმიტომ, რომ რუსეთი ვერ ვითარდება მიდის და მისი უკან-უკან, ყველა პარამეტრების მიხედვით", - აცხადებს შარაშენიძე.

ექსპერტი მიიჩნევს, რომ რუსეთი ყველა კვლევების მიხედვით ნიგერიის დონეზე დგას.

"ცხოვრების პარამეტრებით, დემოკრატიის და ეკონომიკის განვითარებით რუსეთი დგას ნიგერიის დონეზე, ერთი განსხვავება ის არის, რომ აქვთ ბევრი ატომური იარაღი და გაეროს უშიშროების საბჭოში მუდმივი ადგილი, მეტი განსხვავება მათ შორის არ არის", - მიიჩნევს ექსპერტი.

თორნიკე შარაშენიძეს აღნიშნავს, რომ რაც არ უნდა აგონიის სტადიაში იყოს რუსეთი და ამის გამო აფუჭებდეს ყველაფერს, - "ჩვენი მისი მეზობელი ვართ და შეიძლება ჩვენ მოგვხვდეს ძალიან მწარედ ეს ყველაფერი. ჩვენ სახუმაროდ არ გვაქვს საქმე".

როგორც ექსპერტი მიიჩნევს, პუტინი დარწმუნებულია, რომ ამ სიტუაციაში გამარჯვებულია, მაგრამ ის შიშები რაც იყო არსად არ წასულა.

"სხვისი ტერიტორიების წართმევით, ისინი ცდილობენ შეაჩერონ მათი დასუსტების პროცესი, რომელიც ჯერ-ჯერობით მაინც გარდაუვალია , უფრო მეტიც, მათი დასუსტების პროცესი დაჩქარდება, ამას მოყვება და უკვე მოყვასანქციები , ამას მოყვება რუსეთის ჩაკეტვა, და რუსეთის ჩაკეტვას რაც მოჰყვა ერთხელ ჩვენ ვიცით, საბჭოთა კავშირი კი ძლიერი იყო, მაგრამ იმის გამო რომ ჩაკეტეს და იყო იზოლირებული, მაგის გამო საბოლოო ჯამში დაინგრა შიგნიდან. თუ რუსეთი ამ ქმედებებით თავს შეიყვანს იზოლაციაში არავის არ აქვს მომავალი, მითუმეტეს რუსეთის მსგავს ქვეყანას, რომელიც არ არის თვითონ განვითარებული, ჩამოკიდებულია ძირითადად ნავთობის, გაზის გაყიდვებზე და განვითარების ერთადერთი შანსი აქვს მაშინ, თუკი ექნება ახლო ურთიერთობები მასზე მეტად განვითარებულ დასავლეთთან, ამაზე თვითონ ამბობენ უარს თავისი გიჟური პოლიტიკის გამო", - აცხადებს "ნიუპოსტთან" საუბარში თორნიკე შარაშენიძე.

ექსპერტი მიიჩნევს, რომ გრძელვადიან პერსპექტივაში რუსეთი არის განწირული, მაგრამ მოკლევადიან პერსპექტივაში, მისივე თქმით, ეს არის ძალიან საშიში, მათ შორის საქართველოსთვისაც.

"ჩვენ ყველა მათი ხუმრობა ყველა მათი ოხუნჯობა და გამოხტომა სერიოზულად უნდა გავაანალიზოთ რა შეიძლება იდგეს ამის უკან", - განმარტა ექსპერტმა.