პარლამენტმა „პატიმრობის კოდექსში“ შესატანი ცვლილებები დაამტკიცა. ცვლილები 89 ხმით არც ერთის წინააღმდეგ მიიღეს.

კანონპროექტის თანახმად, შეიქმნება ახალი ტიპის დაწესებულებები, მსჯავრდებულები საშიშროების რისკის მიხედვით ოთხ სხვადასხვა ტიპის - დაბალი, განსაკუთრებული, ნახევრად ღია და დახურული ტიპის დაწესებულებაში გადანაწილდებიან.

ასევემ ცვლილებების მიხედვით, სახელწოდება ეცვლება და სარეაბილიტაციო დაწესებულებად გარდაიქმნება არასრულწლოვანთა სპეციალური დაწესებულება.

2.5 კვ.მ-დან მინიმუმ 4 კვ.მ-მდე იზრდება ერთი მსჯავრდებულისთვის განკუთვნილი საცხოვრებელი ფართის საერთო სტანდარტი.

ღია დაწესებულებაში მყოფი მსჯავრდებულებისთვის ხანგრძლივი პაემნების რაოდენობის გაზრდასთან ერთად ფართოვდება მნახველთა წრე. მსჯავრდებულებს წერილობითი თხოვნის საფუძველზე პაემნის უფლება მიეცემათ შვილთან, ნაშვილებთან, გერთან, შვილიშვილთან, მეუღლესთან, იმ პირთან, რომელთანაც გააჩნია საერთო შვილი, მშობელთან (მშვილებელთან), ბებიასთან, პაპასთან, დასთან და ძმასთან.

დაზუსტდა ვიზუალური ან/და ელექტრონული მეთვალყურეობისა და კონტროლის განხორციელების წესები. დასაბუთებული ვარაუდის არსებობისას ადმინისტრაციას უფლება აქვს ბრალდებულთა/მსჯავრდებულთა ან სხვა პირთა უსაფრთხოების ინტერესებიდან გამომდინარე, განახორციელოს ვიზუალური და ელექტრონული მეთვალყურეობა და კონტროლი. კერძოდ, ელექტრონული მეთვალყურეობის ან/და აუდიო-ვიდეო ჩაწერის განხორციელებისას, ადმინისტრაცია ვალდებულია გააფრთხილოს ბრალდებულები/მსჯავრდებულები გარდა საქართველოს კანონმდებლობით გათვალისწინებული შემთხვევებისა.

საკანონმდებლო ცვლილებების თანახმად, პირობით ვადაზე ადრე გათავისუფლების 7-კაციან მუდმივმოქმედ კომისიაში სამინისტროს სამის ნაცვლად, 2 წარმომადგენელი ეყოლება და ერთ ადგილს ზოგადსაგანმანათლებლო ან აკადემიური წრეების წარმომადგენელს დაუთმობს.

საკანონმდებლო ცვლილებათა პაკეტზე მუშაობა 2012 წლის ოქტომბრის შემდეგ დაიწყო და სამუშაო პროცესის ყველა ეტაპზე ჩართულნი იყვნენ სამთავრობო სტრუქტურებისა და სამოქალაქო სექტორის წარმომადგენლები, ადგილობრივი და ევროპის საბჭოს ექსპერტები, სახალხო დამცველი, საერთაშორისო და არასამთავრობო ორგანიზაციები. მრავალჯერადი კონსულტაციებისა და დისკუსიების შედეგად მიღებულ კანონპროექტის საბოლოო ვარიანტში გათვალისწინებულია ყველა საერთაშორისო სტანდარტი და რეკომენდაცია.