სასჯელაღსრულების სამინისტროს ინფორმაციით, აკრძალული საგნის შენახვა-ტარება-სარგებლობის ფაქტზე სამ მსჯავრდებულს ბრალი წარედგინა.

როგორც სუბარის უწყების მიერ გავრცელებულ განცხადებაშია ნათქვამი, აღნიშნული მუხლით ჩადენილი დანაშაული სასჯელის სახით სამ წლამდე ვადით თავისუფლების აღკვეთას ითვალისწინებს.

"2014 წლის 14 აპრილს მსჯავრდებულებს ი.ბ.-ს, ი.ლ.-სა და რ.კ.-ს საქართველოს სსკ-ის 3782-ე მუხლის პირველი ნაწილით - თავისუფლების აღკვეთის დაწესებულებაში მოთავსებული პირის მიერ აკრძალული საგნის შენახვა-ტარების და სარგებლობის ფაქტზე ბრალი წარედგინათ. გამოძიების მიხედვით, სასჯელაღსრულების დეპარტამენტის #14-ე დაწესებულებაში მოთავსებულმა მსჯავრდებულმა ი.ბ.-მ რენტგენის სურათებისთვის განკუთვნილი ფირების გამოყენებით თვითნაკეთი ბანქო დაამზადა, რომელსაც მართლსაწინააღმდეგოდ ინახავდა და ატარებდა.

2014 წლის 5 თებერვალს, დაწესებულების თანამშრომლების მიერ ჩატარებული შემოწმება-დათვალიერებისას მსჯავრდებულ ი.ბ.-ს თვითნაკეთი ბანქო ჩამოერთვა.

ქარხნული წესით დამზადებული მექანიკური საპარსი მოწყობილობის დაშლის შედეგად მიღებულ ბასრ საგანს ინახავდნენ და ატარებდნენ სასჯელაღსრულების დეპარტამენტის N2-ე დაწესებულების მსჯავრდებულები ი.ლ. და რ.კ.

აკრძალული საგანი დაწესებულების თანამშრომლებმა ი.ლ.-ს 2014 წლის 11 იანვარს ჩამოართვეს, ხოლო მსჯავრდებულ რ.კ.-ს 2013 წლის 16 ნოემბერს", - ნათქვამია განცხადებაში.