17 აპრილს, ევროპარლამენტი აპირებს განიხილოს რეზოლუცია, რომელიც პროექტ „სამხრეთ ნაკადის“ გაზსადენის რეალიზების შეწყვეტას ითვალისწინებს.

„ ეს მოხდა მას შემდეგ, რაც ევროპარლამენტმა გადაწყვიტა, რომ პროექტის „სამხრეთ ნაკადი“ რეალიზება არ უნდა მოხდეს“, - წერს ბულგარული გამოცემა "Биволъ".

რეზოლუცია ევროპის სახალხო პარტიის, ევროპელი სოციალისტების, ლიბერალების, მწვანეებისა და კონსერვატორების წარმომადგენლებმა მოამზადეს.

„სამხრეთ ნაკადი“ (South Stream) - რუსულ-იტალიურ-ფრანგულ-გერმანული გაზსადენის პროექტია, რომელსაც შავი ზღვის ფსკერზე ანაპის რაიონიდან ბულგარეთის პორტ ვარნამდე უნდა გაევლო. შემდეგ მის ორ განშტოებას, ბალკანეთის ნახევარკუნძულის გავლით -იტალიასა და ავსტრიაში, თუმცა საბოლოო მარშრუტები არ დადგენილა. გაზსადენის მშენებლობა 2012 წელს დაიწყო და 2015-ში უნდა დამთავრებულიყო. პროექტის ღირებულება შეფასებულია 16 მილიარდ ევროდ.

„სამხრეთ ნაკადი“ გაზსადენ „ნაბუკოს“ კონკურენტად ითვლება, რომელმაც საქართველოზე უნდა გაევლო და რომელსაც აშშ და ევროკავშირი უჭერს მხარს.

მოამზადა ლევან ებრალიძემ.