უცხოეთში ცნობილი ქართველი დიზაინერი შერონ მარი (მარცვალაძე) საქართველოში მალე გრანდიოზულ შოუს გამართავს. უცხოელი მოდელები, ფოტოგრაფები და მოდის მიმდევრები ამ შოუზე უხვად იქნებიან. სხვადასხვა ქვეყნის წარმომადგენლებთან მოლაპარაკება უკვე დასრულებულია. ჩვენებისთვის საქართველოს მექსიკიდან სპეციალურად ევროპულ მოდის სამყაროში კარგად ცნობილი ფანი ტორესი ეწვევა, ორგანიზატორები მილანის, ლონდონისა და პარიზის მოდის კვირეულის ფოტოგრაფს ანტონიო ტაკონისაც ელიან. ეს ფოტოგრაფი შერონ მარის შემოქმედებას კარგად იცნობს,

დიზაინერის კოლექციის ფოტოგადაღება მან ორი წლის წინ სიცილიაში მოაწყო. რაც შეეხება ფანი ტორესს ის შერონმა იტალიაში გაიცნო. ევროპაში ცნობილმა მოდელმა თავადვე შესთავაზა ქართველ დიზაინერს: „სამომავლოდ, როცა ჩვენება გექნებათ, თუ შემატყობინებთ მონაწილეობას აუცილებლად მივიღებ, იქ ჩამოვალ სადაც იქნება, გზას და მანძილს მნიშვნელობა არა აქვსო“. ამას დონეცკში „ფეშენ დეიზე“ მისი გამოსვლა მოჰყვა, იქ მოდელმა შერონ მარის სამოსი წარმოაჩინა, ამჯერად კი მოდელი საქართველოში გამოსამგზავრებლად ემზადება.

შერონ მარი: „ამ შოუს იტალია მიფინანსებს, ჩემი კოლექციაც რომში იკერება და უკვე ივლისში მზად იქნება. უცხოელი დელეგაცია სხვადასხვა ქვეყნიდან ჩამოდის. ასევე მოლაპარაკება გვაქვს პორტუგალიელ ცნობილ დიზაინერთან ნუნო გამასთან, მინდა რომ თბილისში ამ დიზაინერის ჩვენებაც მოვაწყო, რასაც ჩემი კომპანია უზრუნველყოფს. რაც შეეხება ჩემს ფეშენ შოუს მართლაც გრანდიოზული იქნება. წითელი ხალიჩით, სამახსოვრო ფოტოებით და რაც მთავარია იმ დადებითი მუხტით, რაც ჩემს ქვეყანაში მყოფ მოდის მიმდევრებს, ძალიან დიდხანს გაჰყვებათ. ფეშენ შოუს ფანი ტორესი გახსნის“.