კერის თქმით, კრემლი უკრაინის ტერიტორიაზე რუსული ჯარების შესაყვანად, სიტუაციით სარგებლობას აპირებს, ისე, როგორც ეს ყირიმის შემთხვევაში იყო.

„ნათელი უნდა იყოს, რომ ამერიკის შეერთებული შტატები და ჩვენი პარტნიორები უყოყმანოდ გამოიყენებენ ოცდამეერთე საუკუნის ინსტრუმენტებს იმისათვის, რომ რუსეთს პასუხი აგებინოს მეცხრამეტე საუკუნის დროინდელი მოქმედებებისთვის“, - განაცხადა აშშ-ის სახელმწიფო მდივანმა.

როგორც კერიმ აღნიშნა, შესაძლო სამხედრო შეჭრა, რუსეთს დიდი ფასი დაუჯდება. ვაშინგტონის მხრიდან ახალი სანქციები რუსული ეკონომიკის ძირითად სფეროებს - საბანკოს, ენერგეტიკულს, სამთომომპოვებელსა და სხვებს შეეხება.

„ისინი ყველანი მაგიდაზე დევს, და პრეზიდენტმა ობამამ უკვე მოაწერა ხელი განკარგულებას ამ მოქმედებების რეალიზაციის შესახებ, იმ შემთხვევაში, თუ რუსეთი არ შეწყვეტს უკრაინის ტერიტორიაზე ზეწოლასა და აგრესიას“, - ხაზი გაუსვა ამერიკელმა სახელმწიფო მდივანმა.

რუსეთის საგარეო საქმეთა მინისტრმა, სერგეი ლავროვმა კერის გამოსვლაზე მალევე მოახდინა რეაგირება. „ჩვენი ამერიკელი პარტნიორები საკუთარი ჩვევების სხვებზე მორგებით ცდილობენ სიტუაციის ანალიზს“, - აღნიშნა ლავროვმა იმის მინიშნებით, რომ აშშ შესაძლოა ევრომაიდანს ფინანსურ დახმარებას უწევდა.

„ისე ჟღერდა, თითქოს ის ხუთი თვის წინ დაბრუნდა და კიევის ცენტრში მაიდანზე მომხდარს აღწერდა“, - თქვა საგარეო უწყების მეთაურმა.

მოამზადა ლევან ებრალიძემ.