უკანონო მიყურადებასთან და ფარული ჩანაწერების გამოყენებასთან დაკავშირებით "სისხლის სამართლის კოდექსით" გათვალისწინებული სანქციები მკაცრდება.

ცვლილებები კოდექსის 157-ე, 158-ე და 159-ე მუხლებში შედის, რომელიც შინაგან საქმეთა სამინისტრომ მოამზადა და განსახილველად პარლამენტს უკვე წარუდგინა.

შსს-ს მიერ შეთავაზებული 157-ე მუხლის მიხედვით პასუხისმგებლობის მიღმა არ დარჩება პირადი ცხოვრების უფლების ხელყოფასთან დაკავშირებული ქმედებები, რომლებსაც კოდექსის მოქმედი რედაქცია არ მოიცავს. გარდა ამისა, მკაცრდება მოცემული მუხლით გათვალისწინებული სანქციები. კერძოდ, დღეს 157-ე მუხლის პირველი ნაწილი (პირადი ან ოჯახური საიდუმლოს უკანონოდ მოპოვება, შენახვა ან გავრცელება, რამაც მნიშვნელოვანი ზიანი გამოიწვია) ითვალისწინებს ჯარიმას, ან გამასწორებელ სამუშაოს ვადით 1-წლამდე, ან თავისუფლების აღკვეთას ამავე ვადით. პარლამენტში წარდგენილი პროექტით გასაწორებელი სამუშაოს ვადა – 2 წლამდე, ხოლო თავისუფლების აღკვეთის ვადა 3-წლამდე იზრდება.

157-ე მუხლის მეორე ნაწილის შემთხვევაშიც, პასუხისმგებლობა თავისუფლების 4-წლამდე ვადით აღკვეთით მძიმდება.

პასუხისმგებლობა მკაცრდება პირადი მიმოწერის, ტელეფონით საუბრის ან შეტყობინების საიდუმლოების დარღვევაზე. პარლამენტში წარდგენილი ცვლილებებით მთლიანად გადაიხედა სსკ-ის შესაბამისი - 159-ე მუხლი.