პარტია „ერთიანი ნაციონალური მოძრაობის“ თბილისის ორგანიზაციის თავჯდომარე გიგი უგულავა სასამართლოს მიმართავს, რომ საარჩევნო თარიღის გამოცხადებიდან არჩევნების დამთავრებამდე სასამართლო პროცესები არ ჩაინიშნოს და სხდომები არჩევნების შემდეგი პერიოდისთვის გადაიდოს.

აღნიშნული თხოვნით უფელბამოსილებაშეჩერებულმა მერმა დღეს მოსამართლე ლაშა ჩხიკვაძეს საქალაქო სასამართლოში მიმართა. სასამართლო რიყის ტერიტორიისა და "ტელეიმედის" გასხვისების საქმეს განხილავს.

მოსამართლემ განაცხადა, რომ აღნიშნულზე თვის ბოლოს იმსჯელებს, იქიდან გამომდინარე, რომ მანამდე საქმის განხილვის განრიგი უკვე ჩანიშნულია.

"მე მაქვს ლეგიტიმური პრეტენზია, რომ "ქართული ოცნება" ამ სასამართლოს იყენებს იმისთვის, რომ წინასაარჩევნოდ ჩამოიშოროს მთავარი ოპოზიციური ძალა. დღეს მივმართე სასამართლოს თხოვნით, როგორც კი ოფიციალურად გამოაცხადებს პრეზიდენტი საარჩევნო თარიღს, სხდომები გადადოს არჩევნების შემდგომი პერიოდისთვის. იმედი მაქვს, მოსამართლე აღნიშნულს გაითვალისწინებს. ეს კარგი იქნება იმისთვის, რომ სასამართლო გამოყენებული არ იქნას წინაასარჩევნო პროპაგანდისთვის. მე ვარ "ნაციონალური მოძრაობის" შტაბის ხელმძღვანელი და უნდა მომეცეს საშუალება სრულყოფილად ვაწარმოო კამპანია საქართველოს მასშტაბით", - განაცხადა გიგი უგულავამ.

ნინა შადური