უკრაინის უმაღლეს რადაში, 7 აპრილს, დარეგისტრირდა დადგენილების პროექტი დონეცკის, ლუგანსკისა და ხარკოვის ოლქებში საგანგებო ვითარების შემოღების აუცილებლობის შსახებ.

დადგენილების პროექტის ავტორი არაფრაქციული სახალხო დეპუტატი ნიკოლაი რუდკოვსკია.

შეგახსენებთ, რომ დონეცკის საოლქო ადმინისტრაციის შენობაში შეჭრილმა სეპარატისტებმა დონეცკის დამოუკიდებელი რესპუბლიკის შექმნის შესახებ გამოაცხადეს. გადაწყვეტილება დონეცკის ოლქის თვითგამოცხადებული „სახალხო საბჭოს“ რიგგარეშე სესიაზე მიიღეს.

გამომსვლელმა გამოაცხადა, რომ ამ მომენტიდან შექმნილია „დონეცკის დამოუკიდებელი რესპუბლიკა“. დამსწრეები ამ განცხადებას ოვაციებითა და შეძახილებით „რუსეთი, რუსეთი!“ შეხვდნენ. მოგვიანებით, „სახალხო საბჭომ“ კიდევ ერთი გადაწყვეტილება მიიღო - შექმნილი რესპუბლიკის რუსეთის შემადგენლობაში შესვლის შესახებ. მომიტინგეები ამ ინფორმაციას შეძახილებით შეხვდნენ: „პუტინ, დაგვეხმარე!“.

ლუგანსკიში უკრაინის უშიშროების სამსახურის შენობაში შჭრილმა სეპარატისტებმა 300 ავტომატი და 20 კილოგრამი ასაფეთქებლები დაიტაცეს.

მოამზადა ლევან ებრალიძემ.