ადამიანის უფლებათა ცენტრი დავით ბაქრაძეს უჩივის

სამართალი - 19:11, 05 Dec, 2012

614

,, 2 დეკემბერს, ,,რუსთავი 2"-ს გადაცემა "პოსტ-სკრიპტუმის" ეთერში ბაქრაძემ პოლიტპატიმართა სიებზე საუბრისას განაცხადა, თითქოს პარლამენტისთვის წარდგენილ სიაში იყო სამცხე-ჯავახეთში ჩადენილ დანაშაულზე გასამართლებული ადამიანი, რომლის სახელიც მან არ დაასახელა. ბაქრაძემ განაცხადა, რომ არის კონკრეტული ადამიანი, რომელსაც სხვა საქმესთან ერთად ბრალად ედება ქართული ეპარქიის დარბევის მცდელობა და ერთი ასეთი მცდელობის დროს, მან ფიზიკური შეურაცხყოფა მიაყენა ქართველ მონაზონს. ამის შემდეგ, ბაქრაძის თქმით, მონაზონი ისე ცუდად გახდა, რომ იგი მკურნალობის მიზნით საავადმყოფოშიც გადაიყვანეს. 24 ნოემბერს, ტვ "მაესტროს" ეთერში, გადაცემა ,,პრეს-პრესში" მოწვეულმა სტუმარმა, საპარლამენტო უმცირესობის წევრმა გოგა ხაჩიძემ ასევე ისაუბრა ვაჰაგნ ჩახალიანზე და განაცხადა, ვის მოუვიდა თავში ამ ადამიანის პოლიტპატიმართა სიაში შეყვანაო. ადამიანის უფლებათა ცენტრის ინფორმაციით, საპარლამენტო უმცირესობის ლიდერი დავით ბაქრაძე, გოგა ხაჩიძის მსგავსად, საუბრობდა ჩვენი ორგანიზაციის დაცვის ქვეშ მყოფ ვაჰაგნ ჩახალიანზე, რომელიც არის სამცხე-ჯავახეთის რეგიონიდან. მისი შეყვანა პოლიტპატიმართა სიაში რეკომენდებული იყო ადამიანის უფლებათა ცენტრის მიერ", - ნათქვამია ცენტრის განცხადებაში. ვაჰაგნ ჩახალიანი წლებია, მის მიმართ დადგენილ უკანონო განაჩენს აპროტესტებს და მასში მონაზონის ფიზიკური შეურაცხყოფის ფაქტი არსადაა მოხსენებული. იგი არღვევს საქართველოს მოქალაქის უდანაშაულობის პრეზუმფციას და მიაწერს დანაშაულს, რომელიც სასამართლოს განაჩენის თანახმად, მას არ ჩაუდენია. ადამიანის უფლებათა ცენტრმა განცხადებით მთავარ პროკურატურას მიმართა. ის საპარლამენტო უმცირესობის ლიდერის განცხადების შესწავლას და საქართველოს მოქალაქის ცრუ დასმენასთან დაკავშირებით მის დაკითხვას ითხოვს", - აცხადებენ ორგანიზაციაში.

ცენტრის ინფორმაციით, პოლიტიკური მოძრაობა "გაერთიანებული ჯავახკის დემოკრატიული ალიანსის" ლიდერი და პოლიტიკური აქტივისტი ვაჰაგნ ჩახალიანი 2008 წლის ზაფხულში ახალქალაქში, მამასთან და უმცროს ძმასთან ერთად დააკავეს. ახალციხის რაიონული სასამართლოს 2009 წლის 7 აპრილის განაჩენით, ვაჰაგნ ჩახალიანს სასჯელის სახით თავისუფლების 10 წლის ვადით აღკვეთა განესაზღვრა.