მთავარი პროკურორის პირველი მოადგილის განცხადებით, საგამოძიებო უწყებაში გიგა ბოკერიას დაბარება სახელმწიფო აუდიტის დასკვნის საფუძველზე განხორციელდა.

ამის შესახებ შოთაძემ გადაცემა "რეაქციაში" ისაუბრა. მთავარი პროკურორის მოადგილე "ნაციონალური მოძრაობის" მიერ გაჟღერებულ ბრალდებებსაც პასუხობს და აცხადებს, რომ ბოკერიას წინააღმდეგ არანაირი პოლიტიკური ანგარიშწორება არ ხორციელდება.

"არანაირი პოლიტიკური ანგარიშსწორება არ არსებობს, არსებობს სისხლის სამართლის საქმეები, რომელზეც არის დანაშაულის ნიშნები და მიმდინარეობს მთელი რიგი საგამოძიებო მოქმედებები. კონკრეტულად პროკურატურაში შემოვიდა სახელმწიფო აუდიტის დასკვნა, სადაც ეჭვქვეშაა დაყენებული უშიშროების საბჭოს ხარჯები. საუბარია 18 მლნ–ის არამიზნობრივ ხარჯვაზე. ამიტომ მისი მოწმის სახით დაბარება განპირობებული იყო არა იმით, რა თანამდებობა ეკავა ადრე, არამედ იმით, რომ ის იყო მოწმე“, – განაცხადა შოთაძემ.