მთავარი პროკურორის პირველი მოადგილის ირაკლი შოთაძის თქმით, დეპუტატ ვალერი გელაშვილის ცემის ფაქტზე გამოძიება დასკვნით ეტაპზეა შესული.

გადაცემა „რეაქციაში“ შოთაძემ არც უარყო და არც დაადასტურა ინფორმაცია იმის შესახებ, რომ გელაშვილის ცემის ფაქტზე ერეკლე კოდუას ბრალი წარედგინება.

„რა თქმა უნდა, ვალერი გელაშვილი დაზარალებულია და ვალდებულები ვართ საქმის კურსში გვყავდეს. მისი ცემის ფაქტზე გამოძიება დასკვნით ეტაპზეა შესული და როდესაც პროკურატურა შესაბამის გადაწყვეტილებას მიიღებს ამის შესახებ საზოგადოებას ვამცნობებთ“, - განაცხადა შოთაძემ.

"რეაქციაში" დეპუტატმა ვალერი გელაშილმა განაცხადა, რომ მისი ცემის ფაქტზე ბრალს სავარაუდოდ კრიმინალური პოლიციის ყოფილ უფროსს ერეკლე კოდუას წარუდგენენ. ასევე არ გამორიცხა, რომ ბრალი დაუმძიმდეთ ექსპრეზიდენტ მიხეილ სააკაშვილს და შს ყოფილ მინისტრს ვანო მერაბიშვილს.