გარდაცვლილი შალვა თათუხაშვილის ოჯახის ადვოკატის ირაკლი ზაქარეიშვილის ინფორმაციით, სამედიცინო ექსპერტიზის დასკვნის მიხედვით, შალვა თათუხაშვილის გვამზე არსებული დაზიანებები მკვრივი და ბლაგვი საგნის არაერთჯერადი მოქმედებითაა გამოწვეული. ამის შესახებ ადვოკატმა დღეს გამართულ ბრიფინგზე განაცხადა.

"დასკვნაში ნათქვამია, რომ შალვა თათუხაშვილის გვამზე არსებული დაზიანებები, ნაჭდებისა და სისხლნაჯღენთების სახით, განვითარებულია რაიმე მკვრივი, ბლაგვი საგნის არაერთჯერადი მოქმედებით. მკვრივ, ბლაგვ საგანს წარმოადგენს მკვრივი კონსისტენციის და ბლაგვი ზედაპირის ნებისმიერი საგანი, როგორიც შესაძლებელია იყოს ადამიანის მუშტი, ხელკეტი და სხვა. თუ რითაა აღნიშნული დაზიანებები მიყენებული, დასადგენია გამოძიების მიერ", - განაცხადა ზაქარეიშვილმა.

მისივე თქმით, დასკვნაში მითითებულია, რომ "გვამის დათვალიერების ოქმში, რომელიც გამომძიებლის მიერაა შედგენილი, არასრულყოფილადაა აღწერილი ის დაზიანებები, რომელიც გვამს აღენიშნება".

მთავარმა პროკურატურამ თათუხაშვილის გარდაცვალებასთან დაკავშირებით ექსპერტიზის პასუხები მიიღო. ამ საკითხთან დაკავშირებით მთავარ პროკურატურაში ბრიფინგი იგეგმება.