რუსეთის სახელმწიფო დუმა „უკრაინაში პოლიტიკური რეპრესიების შესახებ“ განცხადების განხილვას გეგმავს.

დეპუტატები აღნიშნავენ, რომ სახელმწიფო დუმა უკიდურესად შეშფოთებულია უკრაინაში მოქალაქეთა უფლებებისა და თავისუფლებების მასიური დარღვევის გამო. „თვითგამოცხადებული ხელისუფლება, ექსტრემისტებზე და სამართალდამცავ ორგანოებზე დაყრდნობით, რეპრესიებისა და ფიზიკური ძალადობის გამოყენებით, პოლიტიკური მოტივებით მოქალაქეთა დევნის მიზნით, იყენებს არასამართლებრივ მეთოდებს პოლიტიკურ ოპონენტებთან მიმართებაში“, - ნათქვამია დოკუმენტის პროექტში.

პარლამენტართა აზრით, პოლიტიკური რეპრესიები უკრაინაში პოლიტიკური კრიზისის ცივილიზებული მოგვარების შესაძლებლობას გამორიცხავს.

„ჩნდება სულ უფრო მეტი მტკიცებულება არასამართლებრივი გასწორებისა. იზრდება უკრაინელ ნაციონალ-რადიკალების ზეწოლა რუსულენოვან მოქალაქეებზე ყველა რეგიონში და განსაკუთრებით, უკრაინის სამხრეთ-აღმოსავლეთით.ოპოზიციის ლიდერების უსაფუძვლო დევნა, პოლიტიკური მოღვაწეების საეჭვო საფუძველზე დაპატიმრებები, ჭეშმარიტად დემოკრატიული საზოგადოებისათვის მიუღებელია“, - ხაზს უსვამენ დეპუტატები.

მოამზადა ლევან ებრალიძემ.