ნადარეიშვილის პასუხი პროკურატურას - თითქოს რაღაც სურათის „დაშეარება“ მოვახდინე „ფეისბუქზე“...

სამართალი - 13:19, 03 Apr, 2014

3029

მთავარი პროკურატურის მიერ გუშინ გაკეთებულ განცხადებას და იმ მასალებს, რომელიც მათ ნაწილობრივ გაასაჯაროვეს, დღეს ბაჩო ახალიას მეუღლე და უფლებადამცველი ანი ნადარეიშვილი გამოეხმაურა.
ნადარეიშვილი მისი მისამართით პროკურატურის ბრიფინგის დროს გამოთქმულ ბრალდებებს ეხმაურება და აღნიშნულს ახალაიებზე ზეწოლად აფასებს.
მისი განმარტებით, ის მასალები, რომელიც გუშინ მთავარმა პროკურატურამ გაასაჯაროვა არის ავთენტური, თუმცა, ამბობს, რომ კადრებში თათუხაშვილი ფსიქოტროპული წამლების ზემოქმედების ქვეშ იმყოფება და ამის შესახებ მას ინფორმაცია ოჯახის წევრებმა მიაწოდეს.

„პროკურატურა არის თავის მართლების პოზიციაში, ძალიან სამწუხაროა, რომ ისინი ეწევიან კვლავ ახალაიების ოჯახის დისკრედიტაციას, გუშინ გაავრცელეს და მე ვიყავი ნახსენები, თითქოს რაღაც სურათის „დაშეარება“ მოვახდინე „ფეისბუქზე“ თუ ამაზე მეტი მათ სათქმელი არ აქვთ, ძალიან სამწუხაროა... კიდევ ერთხელ მივმართავ მათ, რომ დაიწყონ გამოძიება შალვა თათუხაშვილის გარდაცვალების ფაქტთან დაკავშირებით. მათ ეს გამოძიება დაწყებული არ აქვთ და თუნდაც ამით, საზოგადოება შეჰყავთ შეცდომაში, ეს ჩვეულებრივი მასალა, როდესაც კორიდორის კამერებით არის დაფიქსირებული როგორ გადაადგილდება ეს ადამიანი, ის რომ მას მიაცემინეს კამერების წინ ჩვენება, ჩვენ ამასთან დაკავშირებით მანამდეც გავაკეთეთ განცხადება და ვიცით, რომ მას იარაღი მიუშვირეს და ისე გააკეთებინეს ეს განცხადება. რაც შეეხება კადრებს, ეს არის ჩვეულებრივი მასალა სადაც პროკურატურა არ გაასაჯაროვებდა იმ ფაქტს, რომ თათუხაშვილს თავზე იარაღი დაადეს და ჩვენება ამ სახით მიაცემინეს. მე შალვა თათუხაშვილს პირადად არ ვიცობდი, მაგრამ როგორც მისი ადვოკატი და ოჯახის წევრები აცხადებენ, ის იყო ფსიქოტროპული წამლების ზემოქმედების ქვეშ ამ ვიდეოში“, - განაცხადა ანი ნადარეიშვილმა.

ნინა გოლოშვილი