მოსკოვის კუნცევსკის სასამართლომ ქართველი გენერლის, რომან დუმბაძის მკვლელობაში ბრალდებულს 14 წლით პატიმრობა მიუსაჯა.

განაჩენის თანახმად, ბრალდებული 52 წლის გოჩა კვირიკაშვილი სასჯელს მკაცრი რეჟიმის კოლონიაში მოიხდის. მსჯავრდებულის თხოვნით, რომელიც დანაშაულს აღიარებს, საქმე განიხილებოდა განსაკუთრებული წესით – მტკიცებულებების შესწავლისა და მოწმეების დაკითხვის გარეშე. კანონის თანხმად, განსაკუთრებული წესით განხილვისას, ბრალდებულისთვის სასჯელის მისჯა ხდება არა უმეტეს გათვალისწინებული მუხლის ორი მესამედისა.

საქართველოს შეიარაღებული ძალების ყოფილი გენერალი რომან დუმბაძე, მოსკოვში, საკუთარ სახლთან ახლოს, რუბლიოვსკაიას გზატკეცილზე 2012 წლის 21 მაისს მოკლეს - მოტოციკლიდან დაცხრილეს. მკვლელობის საფუძველი ბიზნესინტერესი გახდა.

2004 წელს, აჭარის მოვლენების დროს თავდაცვის სამინისტროს 25-ე მოტომსროლელი ბრიგადის მეთაურ რომან დუმბაძემ ჩოლოქის ინციდენტის დროს ქვედანაყოფი მთავარსარდლის დაქვემდებარებიდან გამოიყვანა და დაუმორჩილებლობა გამოაცხადა. საქართველოს მაშინდელმა ხელისუფლებამ ღალატის გამო ახალგაზრდა გენერალი თანამდებობიდან გადააყენა და პრეზიდენტმა სააკაშვილმა მას რამდენიმე დღე მისცა მოსაფიქრებლად, წინააღმდეგ შემთხვევაში, გადამდგარ გენერალს სამაგალითო დასჯით დაემუქრა. რომან დუმბაძე, როგორც სამშობლოს მოღალატე რამდენიმე თვე იძებნებოდა. მოგვიანებით, ის დააკავეს, სამშობლოს ღალატის ბრალდებით გაასამართლეს და 17 წლით პატიმრობა მიუსაჯეს.

2008 წელს, რუსეთ-საქართველოს ომის დროს, გენერალმა ბორისოვმა, რომელიც რუს ოკუპანტთა სამხედრო ნაწილებს ხელმძღანელობდა საქართველოს მთავრობას ძველი მეგობრის - რომან დუმბაძის გადაცემა მოსთხოვა და ქართველი გენერალი ფოთის პორტში დატყვევებულ 12 ქართველ სამხედროზე გაიცვალა. გენერალმა ბორისოვმა დუმბაძე რუსეთსი წაიყვანა, სადაც 2010 წელს რუსეთის პრეზიდენტის ბრძანებით, რუსეთის მოქალაქეობა მიენიჭა და მოსკოვში ცხოვრობდა.