„მეტრო “თავისუფლების მოედანთან ” მდებარე მაღაზიის სახურავზე 26 მაისის აქციის დაშლის შემდეგ აღმოჩენილი სულიკო ასათიანისა და ნიკა კვინტრაძის ცხედრების ექსპერტიზა დასრულდა“, – ამის შესახებ „კვირას“ სასამართლო სამედიცინო ექსპერტიზის ცენტრის „ვექტორის“ დირექტორმა ალექსანდრე გეჯაძემ განუცხადა.

გეჯაძის თქმით, ექსპერტიზა მოსამართლის ნებართვის საფუძველზე ცენტრს გამოძიებამ დაუკვეთა და გამოძიების ინტერესებიდან გამომდინარე, დეტალებს ვერ გაახმოვანებს, თუმცა აღნიშნა, რომ ცხედრებს დაზიანებები ჰქონდა, რაზეც დასკვნა უკვე დადებულია და შემდგომი შესწავლა-რეაგირებისთვის გამოძიებას გადაეცა.

„გამოძიების ინტერესებიდან გამომდინარე, დეტალებს ვერ გეტყვით. შედეგები გადაეცემა სამართლოს. ფაქტია, რომ არსებობს, როგორც სამართლებრივი, ისე ორგანიზაციული ხასიათის კითხვები. ჩვენც გვაქვს კითხვები, რომელზეც გამოძიებამ უნდა იმსჯელოს. გეტყვით, რომ ორივე ცხედარზე არის გარკვეული დაზიანებები. თუმცა, მე უფლება არა მაქვს, გითხრათ, რა ტიპის დაზიანებებია ეს და როგორ შეიძლება იყოს მიყენებული“, - განაცხადა ალექსანდრე გეჯაძემ. მისი თქმით, ცხედრებს, როგორც ძვლების კომპიუტერული, ისე სხვა ტიპის გამოკვლევები ჩაუტარდათ. გეჯაძის განმარტებით, ექსპერტებმა ცხედრები სხვადასხვა ადგილას შეისწავლეს. მისი განცხადებით, ერთი გარდაცვლილის ცხედარს ექსპერტიზა ქუთაისში ცხაკაიას სახელობის საავადმყოფოში, მეორეს კი თბილისში, ღუდუშაურის ინსტიტუტში ჩაუტარდა.

სულიკო ასათიანისა და ნიკა კვინტრაძის ცხედრები 2011 წლის 26 მაისის აქციის დაშლის მომდევნო დღეებში მეტროსადგურ „თავისუფლების მოედნის“ მიმდებარე ტერიტორიაზე, მაღაზიის სახურავზე შემთხვევით აღმოაჩინეს. მაშინ, გარდაცვალების ოფიციალურ მიზეზად მაღალი ძაბვის კაბელთან შეხება დასახელდა. თუმცა, მალევე გაჩნდა ვერსია, რომ ორივე აქციის დაშლის დროს გარდაიცვალა, ხოლო ცხედრები სახურავზე დააწყვეს.