ჩილეში, ქალაქ იკიკეში, მიწისძვრამ მაგნიტუდით 8,2 სულ მცირე 5 ადამინის სიცოცხლე იმსხვერპლა, იტყობინება ქვეყნის შსს.

შესაძლო ცუნამის შესახებ გაფრთხილება, რომელიც მიწისძვრის კვალად გამოაცხადეს, წყნარ ოკეანეზე გამავალი ყველა ლათინოამერიკული ქვეყნისთვის - პერუდან ნიკარაგუამდე, მოგვიანებით გააუქმეს ყველა სახელმწიფოსთვის პერუსა და ჩილეს გარდა. ჩილესთან მიმართებაში გაფრთხილება ოთხშაბათს ძალაში დარჩება გრინვიჩის დროით მინიმუმ 08:00 საათამდე.

ჩილეს სამხედრო-საზღვაო ძალები იტყობინებიან, რომ ჩილეს სანაპიროებს ცუნამის დაახლოებით 2 მეტრი სიმაღლის ტალღები მიწისქვეშა ბიძგებიდან 45 წუთში დაეჯახა.

მიწისძვრის კერა მცირე სიღრმეზე, ოკეანის ფსკერიდან სულ 10 კილომეტრში მდებარეობდა.

დაღუპულთა შორის არიან გულის შეტევით გარდაცვლილები და ნანგრევებში მოყოლილები. მიწისძვრამ მეწყერები, ელექტროგადამცემი ხაზების წყვეტა, ხანძრები და სეისმური მდგრადობის არმქონე, ძველი

პროექტებით აგებული შენობების დანგრევა გამოიწვია. ნგრევის მასშტაბი უფრო ნათელი გახდება, როდესაც ჩილეში გათენდება (13:48 გრინვიჩის დროით).

გზები ზოგ ადგილას მეწყერებმა ჩახერგა, რამაც შექმნა მანქანების საცობები, რომლებითაც სანაპირო რაიონების მოსახლეობა ცუნამისათვის მიუღწევად მთებში ევაკუირებას ცდილობდა.

სააგენტო ასოშიეიტედ პრესი იტყობინება, რომ ბიძგები მეზობელ ქვეყნებში - ბოლივიასა და პერუშიც იგრძნობოდა.

მიუხედავად გზების გადატვირთვისა, სანაპირო რაიონების მოსახლეობის ევაკუაცია ძირითადად მშვიდ გარემოში მიმდინარეობს.

მიწისძვრის შემდეგ, ქალთა ადგილობრივი ციხიდან 300-ზე მეტი პატიმარი გაიქცა.

ჩილე წარმოადგენს მსოფლიოს სეისმურად ერთ-ერთ ყველაზე აქტიურ რეგიონს.

2010 წელს მიწისძვრამ მაგნიტუდით 8,8 გამოიწვია ცუნამი ჩილეს ცენტრალურ ნაწილში: შედეგად 500-ზე მეტი ადამიანი დაიღუპა, 200 ათასზე მეტი სახლი კი დაინგრა.

ასოშიეიტედ პრესი იხსენებს, რომ როდესმე დარეგისტრირებულთაგან, ყველაზე ძლიერი მიწისძვრა მაგნიტუდით 9,5, ასევე ჩილეში მოხდა. ეს იყო 1960 წელს, დაიღუპა 5 ათას ადამიანზე მეტი.

მოამზადა ლევან ებრალიძემ.