ნატო რუსეთთან პრაქტიკულ სამოქალაქო და სამხედრო თანამშრომლობას წყვეტს

მსოფლიო - 21:48, 01 Apr, 2014

3069

ნატო-ს საგარეო საქმეთა მინისტრები გმობენ რუსეთის მიერ უკრაინის მიმართ განხორციელებულ უკანონო სამხედრო ინტერვენციას და უკრაინის სუვერენიტეტისა და ტერიტორიული მთლიანობის დარღვევას.
“გადავწვიტეთ, შეწყდეს ყველა პრაქტიკული სამოქალაქო და სამხედრო თანამშრომლობა ნატო-სა და რუსეთს შორის. ჩვენი პოლიტიკური დიალოგი ნატო-რუსეთის საბჭოში შესაძლოა, გაგრძელდეს საჭიროების მიხედვით, ამბასადორიალის დონეზე, აზრთა გაცვლა-გამოცვლის დაშვებისთვის. ჩვენ განვიხილავთ ნატო-ს ურთიერთობებს რუსეთთან ივნისში მომავალ შეხვედრაზე. არ ვაღიარებთ რუსეთის უკანონო და არალეგიტიმურ მცდელობას ყირიმის ანექსიასთან დაკავშირებით. ნატო-უკრაინის კომისიის მიერ გაკეთებული განცხადების გათვალისწინებით, მოვუწოდებთ რუსეთს, დაუყოვნებლივ მიიღოს ზომები, კვლავ დაიცვას საერთაშორისო სამართლის ნორმები, ასევე, თავისი საერთაშორისო ვალდებულებები, პასუხისმგებლობა და დაუყოვნებლივ ჩაერთოს გულწრფელ დიალოგში საკითხების პოლიტიკური და დიპლომატიური გზით გადაწყვეტის შესახებ, რომელიც პატივს სცემს საერთაშორისო სამართალს და უკრაინის საერთაშორისოდ აღიარებულ საზღვრებს. ჩვენ მხარს ვუჭერთ ეუთო-ს სადამკვირვებლო მისიის წარმომადგენლობას უკრაინაში. მხარს ვუჭერთ ყველა სახელმწიფოს სუვერენიტეტს, პოლიტიკურ დამოუკიდებლობას, მათი საზღვრების ურღვევობას და ტერიტორიულ მთლიანობას საერთაშორისოდ აღიარებულ ფარგლებში. დამოუკიდებელი, სუვერენული, სტაბილური, დემოკრატიის ერთგული, უმცირესობების, ადამიანის უფლებებისა და კანონის უზენაესობის პატივისმცემელი უკრაინა ევროატლანტიკური უსაფრთხოების მნიშვნელოვანი ფაქტორია”, - ნათქვამია განცხადებაში.