გერმანიის კანცლერი, ანგელა მერკელი მოუწოდებს უკრაინას პოლიტიკისკენ, რომელიც მიმართული იქნება საზოგადოების გაყოფის გადალახვისაკენ. „უკრაინას სჭირდება შერიგებაზე, და არა დაყოფაზე ორიენტირებული პოლიტიკოსები“, - განაცხადა მერკელმა ბერლინში. კანცლერმა აღნიშნა, რომ 25 მაისის არჩევნებზე პრორუსმა კანდიდატმაც რომ გაიმარჯვოს, დასავლეთი მზად იქნება ეს მიიღოს. მთავარია, რომ უკრაინელმა ამომრჩეველმა თავად მიიღოს გადაწყვეტილება, ხაზი გაუსვა გერმანიის მთვრობის მეთაურმა.

მერკელმა გააფრთხილა რუსეთი, რომ არ ჰქონდეს უკრაინულ საარჩევნო კამპანიაზე ზემოქმედების მცდელობა. უკრაინასთან საზღვარზე რუსი სამხედროების შეკრება კანცლერს ბევრ კითხვას უჩენს. „თუ საქმე ისევ საერთაშორისო ნორმების დარღვევამდე მივა, ჩვენ ეკონომიკური სანქციებით მოვახდენთ რეაგირებას“, - თქვა მერკელმა. ფედერალურმა კანცლერმა კიდევ ერთხელ გაუსვა ხაზი, რომ ყირიმის შეერთებას საერთაშორისო და უკრაინული კანონმდებლობის დარღვევად მიიჩნევს.

მისი აზრით, ევროპას მოიცავს „წარმოუდგენელი ქაოსი“, თუ არსებული წესრიგი ყირიმის მსგავსი რეფერენდუმების კითხვის ნიშნის ქვეშ აღმოჩნდება. ამავდროულად, გერმანიის კანცლერმა აღნიშნა, რომ ევროკავშირი კონფლიქტის ესკალაციით დაინტერესებული არ არის. „ჩვენ ძალიან ვისურვებდით, რომ რუსეთმა თამაშის წესები დაიცვას და ჩვენ დაგვიახლოვდეს“, - განაცხადა ანგელა მერკელმა.

მოამზადა ლევან ებრალიძემ.