მთავარი პრობლემა - საპატიმროებში არსებული მდგომარეობა

სამართალი - 12:14, 31 Mar, 2014

1947

სახალხო დამცველმა 2013 წლის ანგარიშის პრეზიდენტაცია გამართა. ომბუდსმენი რეკომენდაციით მიმართავს პროკურატურას, რათა პატიმრისადმი არასათანადო მოპყრობის ყველა ფაქტი გამოიძიოს. ანგარიშის პრეზენტაციაზე უჩა ნანუაშვილმა ბოლო ერთი წლის განმავლობაში ქვეყანაში ადამიანის უფლებების დაცვის გაუმჯობესების მიზნით გატარებულ ტენდენციებზეც ისაუბრა. მისი თქმით, მიღებულ იქნა ადამიანის უფლებათა დაცვის სტრატეგია, ასევე, შრომის კოდექსში შევიდა პოზიტიური ცვლილებები, დაიწყო მუშაობა ანტიდისკრიმინაციულ კანონმდებლობაზე, საერთო სასამართლოებში დაშვებულ იქნება ფოტო-ვიდეო და აუდიო გადაღება.

ომბუდემენის ანგარიშში ადამიანის უფლებათა დაცვის კუთხით ქვეყანაში არსებულ პრობლემებზეცაა საუბარი.

“პრობლემებიდან პირველ რიგში, მინდა, დავასახელო სასჯელაღსრულების დაწესებულებებში არსებული მდგომარეობა. მიუხედავად პოზიტიური ცვლილებებისა, ჩვენთვის ძალიან საგანგაშო იყო რამდენიმე პატიმრის გარდაცვალებასთან დაკავშირებული ინფორმაციები, როდესაც ხელისუფლებამ ვერ უზრუნველყო მისი კონტროლის ქვეშ მყოფ პირთა უსაფრთხებისა და სიცოცხლის დაცვა. შესაბამისად, ჩვენი ერთ-ერთი რეკომენდაცია მთავარი პროკურატურისადმი მდგომარეობს იმაში, რომ მოხდეს პატიმრისადმი არასათანადო მოპყრობის ყველა ფაქტზე გამოძიების დაუყონებლივ დაწყება სწორედ პროკურატურის მხრიდან”, - განაცხადა უჩა ნანუაშვილმა.

ომბუდსმენის კიდევ ერთი რეკომენდაცია სამართალდამცველების მხრიდან განხორციელებულ შესაძლო არასათანადო მოპყრობის ფაქტებს უკავშირდება. ნანუაშვილის თქმით, სავარაუდო დარღვევების შესახებ ომბუდსმენის ოფისში არაერთი განცხადებაა შესული. სახალხო დამცველი ხელისუფლებას ამ ფაქტების ეფექტური გამოძიებისკენ მოუწოდებს. “სწორედ ამიტომ, ჩვენი თხოვნა პარლამენტისადმი მდგომარეობს იმაში, რომ მოხდეს დამოუკიდებელი საგამოძიებო მექნიზმის შექმნა, რომელიც მსგავსი შემთხვევების მიუკერძოებელ გამოძიებას უზრუნველყოფს”, - განაცხადა ნანუაშვილმა. სახალხო დამცველი დახურულ დაწესებულებებში დარღვევების დაფიქსირების უზრუნველყოფ მიზნით უფლებამოსილების გაზრდას ითხოვს.ნანუაშვილის თქმით, კანონში შესაბამისი ცვლილებები უნდა განხორციელდეს, რომლის თანახმად, სახალხო დამცველის რწმუნებულს უფლება მიეცემა, ყველა დახურულ დაწესებულებაში მსჯავრდებულის დაზიანებებისა და გარემოს ფოტოგადაღება მოახდინოს.