იანუკოვიჩმა განაცხადა, რომ უკრაინამ ყირიმი დაკარგა, და პირობა დადო, რომ მიაღწევს ქვეყნის დანგრევაში დამნაშავეების დასჯას. როგორც რუსული საინფორმაციო საშუალებები იტყობინებიან, დევნილი პრეზიდენტი დარწმუნებულია, რომ „უკრაინელი ხალხის უმრავლესობას არ აქვს შესაძლებლობა შეიტყოს ქვეყნის მთელ ტერიტორიაზე ცხოვრების რეალური სურათი, თანდათანობით ყველგან ძალადობის მატების, ანარქიისა და მოახლოებული ეკონომიკური კატასტროფის შესახებ“.

მისი თქმით, „უკრაინის კანონიერი ხელისუფლების ჩამოგდება დასავლეთში დაიგეგმა, და ეს ასეთი სცენარის პირველი მაგალითი არ არის“. „ამ შეიარაღებულმა „ასეულებმა“ და სახელმწიფო პროცესების არაადექვატურმა მართვამ, იმავე წამს გამოიწვია ხალხის რეაქცია - უკრაინამ ყირიმი დაკარგა“, - განაცხადა იანუკოვიჩმა.

„ჩვენ ეტაპობრივად ვზრდიდით ხელფასებს, პენსიებს, ქვეყნის რეფორმირებას, ევროპულ სტანდარტებთან მიახლოებით, ვემზადებოდით ევროკავშირთან თავისუფალი ვაჭრობის ზონაზე და ასოცირების შესახებ შეთანხმებაზე ხელმოსაწერად. მაგრამ ოქტომბრის თვეში აღმოვაჩინეთ, რომ ამ შეთანხმებებს არ გაუვლიათ სავალდებულო საპარლამენტო მოსმენები საქონელმწარმოებელთა თანდასწრებით, - აღნიშნა იანუკოვიჩმა. - და როდესაც ამ საკითხის ფორსირება დაიწყეს, და ინფორმაცია მივიდა მსხვილ წარმოებებამდე, საქონელწარმოების გაერთიანებებამდე, მაშინ ეს მათთვის შოკი იყო“.

„ჩვენი, უკრაინული წარმოება კონკურენტუუნარო ხდებოდა. საკუთარი სამომხმარებლო ბაზრიდან წასვლა ხდებოდა საჭირო“, - აღნიშნა იანუკოვიჩმა.

უმუშევარი დარჩებოდა 7-8 მილიონი ადამიანი, რაც უკრაინის შრომისუნარიანი მოსახლეობის თითქმის ნახევარია. ანალოგიური პრობლემა ეხებოდა პრაქტიკულად მთელ მანქანათსამშენებლო კომპლექსს, ენერგეტიკულ, სამხედრო-მრეწველობის კომპლექსებს და ასე შემდეგ. „ჩვენ არ გვქონდა სხვა გამოსავალი გარდა იმისა, რომ ჩვენი პარტნიორებისათვის ევროკავშირიდან შეგვეთავაზებინა პაუზის აღება, გაგვემართა სამმხრივი მოლაპარაკებები ევროკავშირ, უკრაინა, რუსეთის ფორმატში“, - ხაზი გაუსვა იანუკოვიჩმა.

„როგორც პრეზიდენტს და როგორც ჩემი ქვეყნის პატრიოტს, ასეთ პირობებზე წასვლა არ შემეძლო“. „მაგრამ ყველაფერი, რაც შემდეგ მოხდა, ყველაზე საშინელ სიზმარშიც წარმოუდგენელი იყო...“, - თქვა ექს-პრეზიდენტმა.

მოამზადა ლევან ებრალიძემ.