ევროკომისია: საქართველომ გასული წლის რეკომენდაციების უმეტესობა შეასრულა

მსოფლიო - 12:53, 28 Mar, 2014

1696

ევროკომისიამ ევროპული სამეზობლო პოლიტიკის (ENP) ყოველწლიური ანგარიში გამოაქვეყნა, რომელიც 2013 წლის 1 იანვრიდან 31 დეკემბრამდე პერიოდს მოიცავს და ევროკავშირი-საქართველოს ENP-ის სამოქმედო გეგმის შესრულებას ასახავს.

როგორც ანგარიშშია ნათქვამი, საანგარიშო პერიოდი საქართველო-ევროკავშირის შორის პოლიტიკური დიალოგის ინტენსიობით, მათ შორის მაღალი დონის ვიზიტებით გამოირჩეოდა. დოკუმენტის თანახმად, ქვეყანამ გასული წლის რეკომენდაციების უმეტესობა შეასრულა. ამ მხრივ განსაკუთრებით საგულისხმოა შეფასება, რომ საქართველოს პრეზიდენტის არჩევნები იყო საუკეთესო ქვეყანაში დღემდე ჩატარებულ არჩევნებს შორის და სრულიად შეესაბამებოდა საერთაშორისო სტანდარტებს.

ევროკომისიის შეფასებით, “2013 წელსა და 2014 წლის დასაწყისში საქართველოს მთავრობამ შეძლო წარმატებით გადაელახა ძალზე კომპლექსური და უპრეცენტენდო ხელისუფლების გადაბარების ეტაპი, რეფორმებისა და ევროკავშირთან დაახლოების პროცესის შეუფერხებლად”.

ამასთან, დოკუმენტში ხაზგასმულია ასოცირების შეთანხმებაზე მოლაპარაკებების წარმატებით დასრულების ფაქტი, რომელიც ადასტურებს საქართველოს ერთგულებას ევროპული ინტეგრაციის კურსისადმი. ევროკავშირი დადებითად აფასებს საქართველოს მთავრობის ძალისხმევას კორუფციის წინააღმდეგ ბრძოლის, სასამართლოს დამოუკიდებლობის გაძლიერების, მედია გარემოსა და პენიტენციალურ სისტემაში ვითარების გაუმჯობესების თვალსაზრისით. ევროკავშირი განსაკუთრებით მიესალმება კონსტიტუციაში შეტანილ ცვლილებებს, რის შედეგადაც საქართველოს პარლამენტის როლი გაიზრდა.

ანგარიშის თანახმად, საქართველომ სავიზო რეჟიმის ლიბერალიზაციის სამოქმედო გეგმის განხორციელების პროცესში ძალიან კარგი პროგრესი აჩვენა. ევროკავშირი კვლავ ადასტურებს საქართველოს ტერიტორიული მთლიანობისა და სუვერენიტეტისადმი ურყევ მხარდაჭერას და მზაობას, ხელი შეუწყოს საქართველოში კონფლიქტის მშვიდობიანი გზით მოგვარებას.