გულუბრყვილობაა, იკითხო, რამდენად უსაფრთხოა სოლარიუმის ამა თუ იმ ბრენდის აპარატი. გულუბრყვილობაა, გჯეროდეს, რომ ,,დასადგომი” სოლარიუმი ,,დასაწოლზე” ნაკლებად საშიშია. გულუბრყვილობაა, იცოდე, რამხელა რისკის ქვეშ ხარ და რუჯის ამ გზით მიღებას მაინც თანხმდებოდე! – ეს არის შეფასება, რომელსაც მედიკოსები სოლარიუმის მომხმარებლებზე აკეთებენ.

ვინაიდან სოლარიუმზე მოთხოვნა დიდია, აპარატების დადგმის აკრძალვა არც ერთ ქვეყანაში ხდება, თუმცა ზოგი სახელმწიფო სილამაზის სალონებს გარკვეულ კანონებს უწესებს. მათ განსაზღვრული აქვთ სოლარიუმის გამოსხივების სიძლიერე.

ესპანელმა ექსპერტებმა გადაწყვიტეს, შეემოწმებინათ, რამდენად იცავდნენ სილამაზის სალონები მათთვის დადგენილ წესებს. მონიტორინგის შედეგად აღმოჩნდა, რომ 10-დან 8 სალონი არა თუ არღვევს კანონს, არამედ იმდენად დიდი დოზით აჭარბებს გამოსხივების სიძლიერეს, რომ, ფაქტობრივად, მომხმარებლების სიკვდილს ხელს აწერს.

კვლევა გასცდა ესპანეთის საზღვრებს და სხვა ქვეყნებშიც ჩატარდა. შედეგი ყველგან ერთნაირი იყო. სამწუხაროდ, გამონაკლისი მხოლოდ მცირე რაოდენობის აღმოჩნდა. სწორედ ამიტომ, როგორც ექსპერტები ამბობენ, საშუალო მაჩვენებლებით, ათიდან რვა სალონი უსაფრთხოების წესების დარღვევის გამო დაიხურა.

მართალია, სალონების დახურვა დადებითად ფასდება, თუმცა წესების დარღვევამ არასასურველი შედეგი უკვე გამოიღო. ეს 41 წლის ქალბატონი ერთ-ერთი მათგანია, ვინც სოლარიუმის სხივების მიღების შედეგად სიმსივნით დაავადდა.

,,5 წლის განმავლობაში სოლარიუმის აქტიური მომხმარებელი ვიყავი. არასოდეს წავიდოდი გასარუჯად, რომ მცოდნოდა, რამდენად დიდი საფრთხის შემცველია ეს გამოსხივება” – ამბობს ჰელენ ბაქსტერი.

მასალა მოამზადა ,,lollipop.ge“