ადვოკატთა ასოციაციის წევრი ზაზა ხატიაშვილი შინაგან საქმეთა სამინისტროს სიცრუის გავრცელებაში ადანაშაულებს.

საქმე ეხება სამინისტროს მიერ 24 მარტს გავრცელებულ განცხადებას, სადაც ნათქვამია, რომ შსს-მ ადვოკატთა ასოციაციის წევრი თაღლითობის ფაქტზე დააკავა.

ხატიაშვილი მიიჩნევს, რომ შსს–ს მიერ გავრცელებული ინფორმაცია მიზნად ისახავს ადვოკატთა კორპუსის დისკრედიტაციას.

„24 მარტს შინაგან საქმეთა სამინისტროს ანტიკორუფციული სააგენტოს მიერ გავრცელდა ინფორმაცია სადაც ნათქვამია, რომ ,,შინაგან საქმეთა სამინისტროს ანტიკორუფციული სააგენტოს თანამშრომლებმა ჩატარებული ოპერატიულ-სამძებრო და საგამოძიებო ღონისძიებების შედეგად დიდი ოდენობით თაღლითობის ფაქტზე საქართველოს ადვოკატთა ასოციაციის წევრი, ადვოკატი მალხაზ შვიდბიჭაშვილი დააკავეს. გამოძიება დიდი ოდენობით თაღლითობის ფაქტზე მიმდინარეობს (საქართველოს სსკ-ის 180-ე მუხლის მე-3 ნაწილის ,,ბ“ ქვეპუნქტით, რაც 6-დან 9 წლამდე თავისუფლების აღკვეთას ითვალისწინებს).“

საქართველოს სამარცხვინო შინაგან საქმეთა სამინისტროს გასაგონად, საქართველოს ადვოკატთა ასოციაცია განმარტავს, რომ მალხაზ შვიდბიჭაშვილი არ არის საქართველოს ადვოკატთა ასოციაციის წევრი. მას 2013 წლის ივნისიდან შეწყვეტილი აქვს ადვოკატთა ასოციაციის წევრობა. ამდენად, გავრცელებული ინფორმაცია არ შეესაბამება სინამდვილეს. საქართველოს ადვოკატთა ასოციაციის თავმჯდომარე მიიჩნევს, რომ შსს–ს მიერ გავრცელებული ინფორმაცია მიზნად ისახავს ადვოკატთა კორპუსის დისკრედიტაციას. საქართველოს ადვოკატთა ასოციაცია მოითხოვს, სამართალდამცავი სრუქტურები მეტი ყურადღებით მოეკიდონ მათზე დაკისრებულ მოვალეობებს და ნუ გაავრცელებენ ცრუ ინფორმაციებს,“ - ნათქვამია ადვოკატთა ასოციაციის განცხადებაში.

ნინო დათაშვილი