დათა ახალაიას ადვოკატმა სანდრო გირგვლიანის მამას თანამშრომლობა შესთავაზა

სამართალი - 11:09, 25 Mar, 2014

2233

„თუ საჭიროდ ჩათვლის, გამოვიდეს კონტაქტზე“, - განაცხადა ირაკლი ზაქარეიშვილმა.

თბილისის საქალაქო სასამართლოში დღეს 3 საათზე სანდრო გირგვლიანის საქმის განხილვა დაიწყება. პირველი ინსტანციის სასამართლო ყოფილი მინისტრის ვანო მერაბიშვილის და კუდ-ის ყოფილი მაღალჩინოსნების დათა ახალაიას, ოლეგ მელნიკოვის, გერონტი ალანიას და ვალერი მეტრეველის ბრალდების საქმეს განიხილავს.

რამდენიმე თვის წინ მთავარმა პროკურატურამ დათა ახალაიას და ოლეგ მელნიკოვს ბრალი ორ დამოუკიდებელ ეპიზოდში წაუყენა. უფრო კონკრეტულად, დათა ახალაიას ბრალი ედება სიცოცხლისათვის საშიში ძალადობის გამოყენებით სანდრო გირგვლიანისთვის თავისუფლების უკანონო აღკვეთაში, სამსახურებრივი უფლებამოსილების ბოროტად გამოყენებაში, სამსახურებრივი უფლებამოსილების გადამეტებასა და სამსახურებრივი სიყალბის ჩადენაში. გარდა ამისა, კუდ-ის ყოფილი უფროსი პროკურატურამ კიდევ ერთ ეპიზოდში დაადანაშაულა: მოქალაქეების - ვამეხ აბულაშვილისა და კახა დაბრუნდაშვილის თავისუფლების უკანონო აღკვეთასა, მათ მიმართ დამამცირებელ და არაადამიანურ მოპყრობაში.

კუდ-ის კიდევ ერთი ყოფილი თანამშრომელი ოლეგ მელნიკოვი ბრალდებულია თავისუფლების უკანონო აღკვეთაში და სამსახურებრივი უფლებამოსილების გადამეტებაში - სანდრო გირგვლიანის, ვამეხ აბულაშვილისა და კახა დაბრუნდაშვილის თავისუფლების უკანონო აღკვეთასა, მათ მიმართ დამამცირებელ და არაადამიანურ მოპყრობაში.

გერონტი ალანიასა და ვალერიან მეტრეველს კი, ბრალი ედებათ მოქალაქეების - ვამეხ აბულაშვილისა და კახა დაბრუნდაშვილის თავისუფლების უკანონო აღკვეთაში, სამსახურებრივი უფლებამოსილების გადამეტებასა და მათ მიმართ დამამცირებელ და არაადამიანურ მოპყრობაში.

რაც შეეხება ვანო მერაბიშვილს, რომელიც იმ დროს შს მინისტრი გახლდათ, მას ბრალი ედება სანდრო გირგვლიანის საქმესთან დაკავშირებით სახელმწიფო პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენებასა და სამსახურებრივ სიყალბეში.

დათა ახალაიას ადვოკატმა ირაკლი ზაქარეიშვილმა სანდრო გირგვლიანის მამას თანამშრომლობა შესთავაზა:

„გირგვლიანის მამა თუ საჭიროდ ჩათვლის, გამოვიდეს ჩემთან კონტაქტზე და ერთად გავარკვიოთ, რა ვითარებაში გარდაიცვალა სანდრო“, - განაცხადა ირაკლი ზაქარეიშვილმა.