ამის შესახებ განცხადება რუსეთის ფედერაციის საგარეო საქმეთა მინისტრმა სერგეი ლავროვმა ჰააგაში, ბირთვული უსაფრთხოების სამიტის ფარგლებში ვიზიტისას გააკეთა.

“თუ ჩვენი დასავლელი პარტნიორები მიიჩნევენ რომ “დიდი რვიანის” ფორმატმა საკუთარი თავი ამოწურა, ჩვენ არ ჩავებღაუჭებით მას. არ ვთვლით, რომ დიდი დანაკლისი იქნება თუ “დიდი რვიანი” არ შეიკრიბება. რაც შეეხება უკრაინას, ქვეყანას საკონსტიტუციო რეფორმების გატარება ესაჭიროება, რომელშიც ქვეყნის რეგიონების ინტერესები იქნება გათვალისწინებული, ამის გარეშე შეუძლებელია ღრმა კრიზისის დაძლევა”,- განაცხადა სერგეი ლავროვმა.

დიდი შვიდეულის შეკრება ბელგიაში ივნისში ისევ რუსეთის გარეშე გაიმართება. აღნიშნული გადაწყვეტილება მსოფლიოს შვიდი უდიდესი ქვეყნის ლიდერებმა ჰააგაში, ბირთვული უსაფრთხოების სამიტის პარალელურად გამართულ შეხვედრაზე მიიღეს.

გერმანიის კანცლერის ანგელა მერკელის განცხადებით, “დიდი რვიანიდან” რუსეთის გამოთიშვის მიზეზი სათანადო პოლიტიკური გარემოს არარსებობაა.