შეერთებული შტატები, უკრაინაში სიტუაციის შემდგომი გამძაფრების შემთხვევაში, მზადაა რუსეთთან მიმართებაში დამატებითი სანქციების შემოღებისთვის. ამის შესახებ ამერიკის შეერთებული შტატების პრეზიდენტმა ბარაკ ობამამ ატომური უსაფრთხოების შესახებ სამიტის დაწყებამდე განაცხადა.

„თუ რუსეთი სიტუაციის ესკალაციას განაგრძობს, ჩვენ მზად უნდა ვიყოთ მას დიდი ფასი დავაკისროთ“, - თქვა ობამამ ჰოლანდიურ გაზეთ Volkskrant-თან ინტერვიუში.

აშშ-ის პრეზიდენტმა განაცხადა, რომ ყველა თავის საუბარში ევროპელ ლიდერებთან, მისი მთავარი მესიჯი იქნება ის, რომ რუსეთი უნდა მიხვდეს, რომ მისი მოქმედება უკრაინაში ვერ დარჩება ეკონომიკური და პოლიტიკური შედეგების გარეშე.

ობამამ „რთული არჩევანი“ უწოდა აშშ-ის მიერ რუსეთის წინააღმდეგ სანქციების შემოღებას. მისი თქმით, ეს ნაბიჯი „იმოქმედებს არამარტო რუსულ ეკონომიკაზე, არამედ შეიძლება გავლენა იქონიოს მსოფლიო ეკონომიკაზეც“.

ობამამ ასევე აღნიშნა, რომ არ განიხილავს ევროპას როგორც დასავლეთისა და აღმოსავლეთის ბრძოლის ველს. „ასეთი სახის მსჯელობაზე, ცივი ომის დასრულების შემდეგ უმჯობესია უარი ვთქვათ, პირიქით, მნიშვნელოვანია, რომ უკრაინას კარგი ურთიერთობა ჰქონდეს აშშ-სთან, ევროპასა და რუსეთთან“,- ხაზი გაუსვა პრეზიდენტმა.

აშშ-ის პრეზიდენტი ბარაკ ობამა, ორშაბათს, ჰააგაში ატომურ სამიტში მიიღებს მონაწილეობას. გარდა ამისა, ამავე „მოედანზე“, ობამა G7-ის ქვეყნების სხვა ლიდერებთან ერთად, უკრაინის იგვლივ არსებულ სიტუაციას განიხილავს. სამიტის დასრულების შემდეგ, პრეზიდენტი ბელგიასა და იტალიას მოინახულებს, რის შემდეგაც საუდის არაბეთში გაემგზავრება.

მოამზადა ლევან ებრალიძემ.