ევროპის კავშირი არამარტო სანქციების შემოღებას აპირებს რუსი ჩინოსნების მიმართ, არამედ ასევე რუსული ენერგორესურსების მიწოდების შემცირებას.

ამის შესახებ ევროსაბჭოს მეთაურმა ჰერმან ვან რომპეიმ, ბრიუსელში ჩატარებული ევროკავშირის ორდღიანი სამიტის შედეგად განაცხადა, წერს რუსული გამოცემა კომერსანტი.

რუსული ენერგორესურსების ჩანაცვლებას, ევროპაში გეგმავენ აშშ-დან ფიქალის გაზის იმპორტისა და განახლებადი და ატომური ენერგეტიკის წილის გაზრდის ხარჯზე. ექსპერტთა შეფასებით, ვერცერთი ამ ზომის გატარება უახლოეს მომავალში შესაძლებელი ვერ იქნება, მაშინ როდესაც აღმოსავლეთ ევროპის ქვეყნების „ენერგეტიკული იზოლაციიდან“ გამოყვანას, სამიტის მონაწილეები უკვე 2015 წელს პირდებიან.

„2015 წლისათვის არ უნდა დარჩეს არცერთი ენერგეტიკულად იზოლირებული ქვეყანა“, - ნათქვამია ევროკავშირის ოფიციალურ კომუნიკეში. თუმცა, ჯერჯერობით, ევროკავშირის მესამედი ქვეყნები, ფინეთის, პოლონეთისა და ბალტიის ქვეყნების ჩათვლით, პრაქტიკულა მხოლოდ რუსული მიწოდების ხარჯზეა უზრუნველყოფილი. რუსეთი სულ აწვდის ევროკავშირის მოხმარების მესამედს, აღნიშნავს გამოცემა.

მოამზადა ლევან ებრალიძემ.