ლევან ჩაჩუა: ექსპერტიზის დასკვნას ზურაბ ჟვანიას ნათესავმაც მოაწერა ხელი

სამართალი - 15:53, 23 Mar, 2014

4877

„პროკურატურა ამბობს, რომ მოვახდინე ზეწოლა იმ ადამიანებზე, ვინც ჩემთან ერთად მოამზადა საექსპერტო დასკვნა. პროკურატურას არანაირი დამადასტურებელი დოკუმენტი არ აქვს, რომ რომელიმე მათგანთან ერთი ზარი მაინც განმიხორციელებია. მთელი ბრალდება, რომელიც ეფუძნება მხოლოდ ერთ ვიდეოს აბსურდულია, ", - განაცხადა ლევან ჩაჩუამ.
ლევან ჩაჩუას თქმით, მან გააკეთა სრულიად სამართლიანი, ობიექტური დასკვნა, რასაც ხელი მოაწერა ექსპერტიზაში მონაწილე ყველა ექსპერტმა, მათ შორის ზურაბ ჟვანიას ბიძაშვილის მეუღლემ.
„ექსპერტიზის მხრიდან რაიმე დარღვევები რომ ყოფილიყო, ჟვანიას ბიძაშვილის მეუღლე არ დამალავდა და გაასაჯაროებდა ამ ფაქტს,“ - განუცხადა სასამართლოს ლევან ჩაჩუამ.
ლევან ჩაჩუას თქმით, როცა კადრები გავრცელდა, ის იმავე საღამოს თავად დაუკავშირდა პროკურატურას და ჩვენების მიცემა შესთავაზა.
"სწორედ აქედან გამომდინარე დამიბარეს პროკურატურაში, მივეცი ჩვენება და იქიდან გამოსვლის შემდეგ ერთ საათში კვლავ დამირეკეს, რაღაც დეტალები იყო დასაზუსტებელი. განმეორებითი დაბარების შემდეგ ვიცოდი, რომ დამაკავებდნენ, მაგრამ ერთი წამითაც არ მიფიქრია არ მივსულიყავი", - განუცხადა სასამართლოს ჩაჩუამ და მისთვის პატიმრობის შეფარდება აუცილებლობად არ მიიჩნია, რადგან, განმარტა, რომ ის გამოძიებას არ დამალვია და არც სამომავლოდ არსებობს ამის საშიშროება.
თბილისის საქალაქო სასამართლომ ცოტა ხნის წინ მთავარი პროკურატურის შეამდგომლობა დააკმაყოფილა და სამედიცინო ექსპერტ ლევან ჩაჩუას და ზურაბ ჟვანიას დაცვის ცვლის უფროს მიხეილ ძაძამიას 2-თვიანი პატიმრობა შეუფარდა.