დამკვირვებელთა მოწინავე ჯგუფი ქვეყანაში 24 საათის განმავლობაში ჩავა. მისიის მანდატი მის მთელ უკრაინაში განლაგებას ითვალისწინებს.

ყირიმში, რომელიც ახლახან რუსეთის შემადგენლობაში შევიდა, დამკვირვებლები ჩასვლას არ აპირებენ.

მისიის წარმომადგენელთა რაოდენობა 500 კაცამდე გაიზრდება. მანდატის მოქმედების ვადა 6 თვეა.

როგორც ორგანიზაციის პრეს-სამსახური აღნიშნავს, მისია აპირებს შეაგროვოს ინფორმაცია უსაფრთხოების სფეროს სიტუაციაზე, გამოავლინოს ეუთოს ვალდებულებებისა და პრინციპების დარღვევები, ასვე დააკვირდეს ადამიაის უფლებების დაცვის სფეროში სიტუაციას.

„სიტუაცია უკრაინაში არასტაბილური და სახიფათო რჩება. ამის გამო, ეუთოს დამკვირვებლებმა თავისი სამუშაო რაც შეიძლება სწრაფად უნდა დაიწყონ“, - განაცხადა გერმანიის საგარეო საქმეთა მინისტრმა ფრანკ-ვალტერ შტაინმაიერმა.

აშშ-ის მთავრობა აღნიშნავს, რომ ეუთოს უფლება აქვს ყირიმშიც შევიდეს. თუმცა, როგორც ეუთოში რუსეთის მუდმივმა წარმომადგენელმა ანდრეი კელინმა განაცხადა, ორგანიზაციას ასეთი მანდატი არ გააჩნია, რამდენადაც ყირიმი პარასკევიდან რუსეთის ნაწილს წარმოადგენს.

მოამზადა ლევან ებრალიძემ.