სომხეთის მიერ ყირიმის ანექსიის აღიარება, უკრაინულ-სომხურ ურთიერთობებში ნეგატიურ შედეგებს გამოიღებს. ამის შესახებ ბრიფინგზე განაცხადა უკრაინის საგარეო საქმეთა მინისტრის მოადგილემ, დანიელ ლუბკივსკიმ.

„სომხეთის ელჩი უკრაინაში საგარეო უწყებაში უკვე ორჯერ მიიწვიეს. ჩვენ მას ჩვენი წუხილი გავაცანით, შესაბამისი დავალება მიიღო ჩვენმა საელჩომ სომხეთში. დღეს სომხურ მხარეს გადაეცა ნოტა, რომელიც მოიცავს მიმართვას სომხეთის ოფიციალური პოზიციის ახსნა-განმარტების მიღების შესახებ. მივმართეთ სომხეთს, რათა მან შეგვატყობინოს ოფიციალურად და საჯაროდ, რომ ის არ აღიარებს ყირიმის ანექსიას. იმ შემთხვევაში, თუ განხორციელდება ან გამოითქმება პოზიცია, რომლის ინტერპრეტირებაც შეგვეძლება როგოც არამეგობრულის, ამას მოჰყვება ნეგატიური შედეგები ჩვენი ორმხრივი ურთიერთობებისთვის“, - თქვა ლუბკივსკიმ.

შეგახსენებთ, რომ 20 მარტს, სომხეთის პრეზიდენტმა სერჟ სარგსიანმა მხარი დაუჭირა ყირიმის „თვითგამორკვევას“. მას ყირიმის ფსევდორეფერენდუმი მიაჩნია „ხალხების თვითგამორკვევის უფლების რეალიზების მაგალითად“.