იაცენიუკი რუსეთს აფრთხილებს

მსოფლიო - 21:57, 20 Mar, 2014

2315

უკრაინის პრემიერმინისტრი არსენ იაცენიუკი რუსეთს აფრთხილებს. იაცენიუკი აცხადებს, რომ აღმოსავლეთის რეგიონების ძალით დაპყრობის მცდელობის შემთხვევაში, უკრაინა მკვეთრ რეაგირებას მოახდენს.
აღნიშნულ ინფორმაციას „უნიანი“ ავრცელებს.
წყაროს ინფორმაციით, ამის შესახებ იაცენიუკმა ბრიუსელში ჟურნალისტებს ევროკომისიაში მოლაპარაკებების გამართვამდე განუცხადა, სადაც ხვალ ევროკავშირსა და უკრაინას შორის ასოცირების შეთანხმების პოლიტიკურ ნაწილზე ხელმოწერა გაიმართება.
"რაც შეეხება რუსეთის სამხედრო აგრესიას, ვიმედოვნებდი და ვიმედოვნებ მხოლოდ მშვიდობიან გზას, მაგრამ მინდა რუსეთი ოფიციალურად გავაფრთხილო, რომ უკრაინის დაპყრობაზე, რუსი სამხედროების მიერ საზღვრის გადაკვეთაზე, აღმოსავლეთ რეგიონების ანექსიაზე ყველაზე მკვეთრ რეაქციას მიიღებს, მათ შორის სამხედრო რეაქციასაც და რუსეთმა ეს უნდა იცოდეს", – აღნიშნა იაცენიუკმა და დასძინა, რომ დასავლეთმა და მთლიანად მსოფლიომ უკრაინისგან ყირიმის განცალკევებისთვის რუსეთს ადეკვატური პასუხი უნდა გასცეს.

"აქ არჩევანი თავისუფლებასა და ფულს შორის არის. ვიმედოვნებ, რომ ევროპელმა პარტნიორებმა ეს იციან. რუსეთი საერთაშორისო სამართალს ანადგურებს", – აღნიშნა იაცენიუკმა.