გამოძიების ვერსიის დამანგრეველ მტკიცებულებას დავუტოვებდი კბილაშვილს სეიფში? -ზოდელავა

სამართალი - 15:08, 20 Mar, 2014

1670

ყოფილი მთავარი პროკურორი მურთაზ ზოდელავა პროკურატურის განცხადებას ეხუმაურება, სადაც ნათქვამია, რომ ჟვანიას კადრები ზოდელავას სეიფში იქნა აღმოჩენილი.

ზოდელავა პროკურატურის ბრალდებას აბსურდულს უწოდებს.

„ჟვანიას საქმის გამოძიება დასრულდა ჩემს პროკურორად დანიშვნამდე დიდი ხნით ადრე. ჟვანიას საქმეში იყო გარკვეული დელიკატური მომენტები, რის გამოც მისი საქმის ნაწილი ინახებოდა არა მურთაზ ზოდელავას კაბინეტში, არამედ პროკურატურის ყველაზე დაცულ კაბინეტში - მთავარი პროკურორის კაბინეტის სეიფში. ეს იყო სისხლის სამართლის საქმის ნაწილი და აქ იყო არა მარტო შემთხვევის ადგილზე გადღებული ფოტომასალა, არამედ შემდგომი ექსპერტიზის და სხვა პროცედურების ამსახველი ფოტო და ვიდეო მასალა. ეს არის კონფიდენციალური ინფორმაცია. წელიწადნახევრის წინ, ისევე როგორც ჩემი კაბინეტი, ისე ეს სეიფები და მასალები გადაეცა მთავარ პროკურორს. აბსურდულია ლოგიკა, რომელსაც დღეს პროკრატურა ახმაურებს. თუ არსებობდა გამოძიების ვერსიის დამანგრეველი მტკიცებულებები, მე ამას დავტოვებდი სეიფში და დაუტოვებდი კბილაშვილს?“, - განაცხადა მურთაზ ზოდელავამ.

პროკურატურაში დღეს გამართულს ბრიფინგზე განაცხადეს, რომ 2012 წლის არჩევნების შემდგომ ზურაბ ჟვანიასა და რაულ უსუპოვის გარდაცვალებასთან დაკავშირებული ფოტო და ვიდეო მასალა აღმოჩენილი იქნა ყოფილი მთავარი პროკურორის, მურთაზ ზოდელავას სამუშაო ოთახში განთავსებულ სეიფში საქმისგან განცალკევებით. ზოდელავა ამ დროისთვის მთავარ პროკურატურაში ზურაბ ჟვანიას გარდაცვალების საქმესთან დაკავშირებით იკითხება.