სომხეთის პრეზიდენტმა სერჟ სარგსიანმა თავის რუს კოლეგასთან, ვლადიმერ პუტინთან საუბარში განიხილა მდგომარეობა, რომელიც ყირიმში „რეფერენდუმის“ შემდეგ შეიქმნა, და ორივემ მოახდინა „კონსტატირება, რომ ეს „ხალხების, თავისუფალი ნების გამოხატვის გზით, თვითგამორკვევის უფლების რეალიზაციის მორიგი მაგალითია“, - იტყობინება სომხეთის ლიდერის პრეს-სამსახური.

საუბარში აქცენტი გაკეთდა საერთაშორისო უფლებების ნორმებისა და პრინციპების დაცვის აუცილებლობაზე, პირველ რიგში - გაეროს წესდებაზე.

გარდა ამისა, სომხური მხარის ინიციატივით შემდგარი საუბრის დროს, პრეზიდენტებმა ასევე განიხილეს ნაბიჯები, რომლებიც იდგმება სომხეთის საბაჟო კავშირში შესვლის განსახორციელებლად.

სომხეთის პრეზიდენტმა, გასულ წელს, რუსეთის ზეწოლის ქვეშ მკვეთრად შეცვალა მაშინდელი თავისი კურსი ევროინტეგრაციაზე და ასოცირებასა და ევროკავშირთან თავისუფალი ვაჭრობის ზონის შესახებ უკვე მომზადებული შეთანხმების პარაფირების ნაცვლად, გამოაცხადა, რომ ქვეყანა შევა საბაჟო კავშირში რუსეთის ხელმძღვანელობით.

მოამზადა ლევან ებრალიძემ.