ავსტრალიამ 12 რუს და უკრაინელ მაღალჩინოსანს რუსეთის მიერ ყირიმის ანექსიის საპასუხოდ სანქციებს დაუწესებს. ამის შესახებ ავსტრალიური The Australian იუწყება.

ავსტრალიის საგარეო საქმეთა მინისტრის ჯული ბიშოფის განცხადებით, ფინანსური სანქციები და სავიზო აკრძალვები შეეხებათ რვა რუს და ოთხ უკრაინელ მაღალჩინოსანს.

ამ ეტაპზე არ დაასახელა რუს და უკრაინელ მაღალჩინოსანთა გვარები, ვისაც ავსტრალია საქნციებს დაუწესებს.

ბიშოფის განმარტებით, გვარების დასახელებისგან თავს იმიტომ იკავებს, რომ ამ ადამიანებმა, ვისაც ავსტრალიაში ანგარიშები აქვთ, ვერ მოასწრონ თანხის გატანა.

რამდენიმე რუს და უკრაინელ მაღალჩინოსანს სანქციები უკვე დაუწესეს აშშ-მა, ევროკავშირმა და კანადამ.