ომბუდსმენმა მთავარ პროკურორს რეკომენდაციით მიმართა

სამართალი - 17:33, 18 Mar, 2014

1838

სახალხო დამცველი უჩა ნანუაშვილი მთავარ პროკურორს პოლიციის მიერ ბრალდებულის მიმართ განხორციელებული შესაძლო დანაშაულებრივი ქმედებების შესწავლის წინადადებით მიმართავს.
როგორც სახალხო დამცველის აპარატში აცხადებენ, სახალხო დამცველის რწმუნებულებთან საუბარში ბრალდებულმა ბ.კ-მ განმარტა, რომ 2013 წლის 2 დეკემბერს, 06:00 საათზე მეგობართან ერთად მიემგზავრებოდა თბილისში, ამ დროს ქუთაისში, ჭავჭავაძის ქუჩაზე მოძრავ სამარშრუტო ტაქსს გადაეღობა ორი ავტომობილი, საიდანაც სამოქალაქო ფორმაში ჩაცმული პირები (ერთ-ერთი იყო უბნის რწმუნებული) გადმოვიდნენ და მას და მის მეგობარს სამარშრუტო ტაქსიდან გადასვლა მოსთხოვეს. არ განუმარტეს რის საფუძველზე აკავებდნენ, იძულებით გადაიყვანეს სამარშრუტო ტაქსიდან და ცალ-ცალკე ჩასვეს ავტომანქანებში. დაკავებულები გადაიყვანეს შსს-ს ქუთაისის საქალაქო სამმართველოში, სადაც შეიყვანეს სხვადასხვა ოთახებში, არც ოჯახის წევრებთან და არც ადვოკატთან დაკავშირების შესაძლებლობა არ მისცეს. "ბ.კ-მ შეხვედრისას აღნიშნა, რომ სამმართველოს შენობაში იმყოფებოდა თითქმის 24 საათის განმავლობაში და მთელი ამ პერიოდის მანძილზე მასზე ხორციელდებოდა როგორც ფიზიკური, ასევე ფსიქოლოგიური ზეწოლა პოლიციის თანამშრომლების მხრიდან. ბ.კ-მ განმარტა, რომ მის ცემაში მონაწილეობდა პოლიციის 5-6 თანამშრომელი, რომლებიც მას ღირსების შემლახავი მეთოდებით აიძულებდნენ ეღიარებინა ქუთაისში, ჭავჭავაძის ქუჩაზე მდებარე ერთ-ერთი ლომბარდის გაქურდვის ფაქტი. აღიარებითი ჩვენების მიცემას დაკავებული დათანხმდა მხოლოდ მას შემდეგ, რაც მიიღო დაპირება, რომ მის მეგობარს – ზ.ზ-ს გაათავისუფლებდნენ. ზ.ზ, მეგობრის აღიარებითი ჩვენების სანაცვლოდ მოგვიანებით მართლაც გაათავისუფლეს. საქმესთან დაკავშირებით შესწავლილი დოკუმენტაციიდან ირკვევა რომ ბ.კ-ს ქუთაისის დროებითი მოთავსების იზოლატორში მიყვანის დროს მართლაც აღენიშნებოდა დაზიანებები. ბ.კ-ს მიმართ განხორციელებულ ფიზიკური და ფსიქოლოგიური ზეწოლის ფაქტებს ადასტურებს მისი მეგობარი ზ.ზ-ც. საქართველოს სახალხო დამცველი მიიჩნევს, რომ სამართალდამცავი ორგანოების თანამშრომლების ქმედებები შესაძლოა საქართველოს სისხლის სამართლის კოდექსით გათვალისწინებულ დანაშაულის ნიშნებს შეიცავდეს, რის გამოც წინადადებით მიმართავს მთავარ პროკურორს, დაიწყოს გამოძიება აღნიშნულ ფაქტებთან დაკავშირებით", - აღნიშნულია სახალხო დამცველის განცხადებაში.