რუსეთთან მიერთებას დნესტრისპირეთიც ითხოვს

მსოფლიო - 12:30, 18 Mar, 2014

1951

რუსეთთან მიერთებას დნესტრისპირეთიც ითხოვს. არაღიარებული რესპუბლიკის უმაღლესი საბჭოს სპიკერმა, მიხეილ ბურლამ რუსეთის სათათბიროს სპიკერ სერგეი ნარიშკინს წერილობთ მიმართა, სადაც ითხოვს, რუსეთის კანონდებლობაში გაითვალისწინონ შესაძლებლობა, რომლის მიხედვითაც, დნესტრისპირეთი რუსეთის ფედერაციის შემადგენლობაში შესვლას შეძლებს.

როგორც რუსული საინფორმაციო სააგენტოები იუწყებიან, აღნიშნული მიმართვა იმ კანონპროექტის გამოძახილია, რომელიც რუსეთთან გამარტივებული წესით ახალი სუბიექტების, მათ შორის ყირიმის მიერთებას გულისხმობს.

ამასთან, როგორც არაღიარებული რესპუბლიკის უმაღლესი საბჭოს სპიკერმა ბურლამ აღნიშნა, ეს კანონპროექტი მხოლოდ ყირიმის მიერთების შესაძლებლობას იძლევა, დნესტრისპირეთის კი - არა.

მიხეილ ბურლა მიიჩნევს, რომ დნესტრისპირეთში ვითარება მას შემდეგ შეიძლება გართულდეს, რაც მოლდოვა ევროკავშირთან ასოცირების ხელშეკრულებას მოაწერს ხელს.

დნესტრისპირეთის რუსეთთან მიერთების საკითხზე რეფერენდუმი 2006 წელს გაიმართა. რეფერენდუმის მონაწილეთა 97,2%-მა რუსეთთან მიერთებას დაუჭირა მხარი. დნესტრისპირეთში რუსეთის 200 000 მოქალაქე ცხოვრობს და სახელმწიფო ენადაც რუსულია გამოცხადებული.