ბაჩო ახალაია - პროკურატურას ერთ-ერთ საქმეში მტკიცებულებად ბაღაფშის ინტერვიუ უდევს

სამართალი - 11:07, 17 Mar, 2014

2080

თავდაცვის ყოფილი მინისტრი ბაჩო ახალაია „კვირის პალიტრასთან“ ექსკლუზიურ ინტერვიუში იმ გახმაურებულ საქმეებზე საუბრობს, რომლებშიც სამართალდამცველები მას და მის ძმა - დათა ახალაიას ადანაშაულებენ. ბაჩო ახალაია ყველა ბრალდებას უარყოფს და ამბობს, რომ ხელისუფლება „საზოგადოებას სიცრუით კვებავს“.ექს-მინისტრის ინფორმაციით, პროკურატურას არც ერთ საქმეზე სერიოზული მტკიცებულება არ გააჩნია. „ხელისუფლება საკუთარ დაგებულ მახეში გაება. არჩევნებამდე და არჩევნების შემდეგ საზოგადოებას სიცრუით კვებავდნენ, რომ ჩვენ მკვლელები, სადისტები, მოძალადეები ვართ. ახლა ყველა ეს საქმე ჩამოეშალათ. სად არის გამოძიება რაფალიანცის საქმეზე, ან ჟვანიას გარდაცვალების ფაქტზე?!არსებული ხელისუფლება ცდილობს საქართველო აგრესიულ ტერორისტულ სახელმწიფოდ წარმოაჩინოს - ლაფანყურის ამბების ქოლგის ქვეშ განაცხადოს, რომ ჩვენ ვამზადებდით ტერორისტებს, ქართულ სპეცსამსახურებს დააბრალოს საქართველოს მოქალაქეების წინააღმდეგ განხორციელებული ტერორისტული აქტები... ერთ-ერთ საქმეში პროკურატურას მტკიცებულებად ბაღაფშის რუსული სააგენტოსთვის მიცემული ინტერვიუ უდევს. ამის შემდეგ რაღაზე უნდა ვილაპარაკო?!“ - აცხადებს ბაჩო ახალაია. რაც შეეხება ე.წ. „ცოცხების კადრებს“, რომელიც 2012 წლის არჩევნებამდე რამდენიმე დღით ადრე გავრცელდა, ახალაიას ინფორმაციით, ბედუკაძე, ინაშვილი და „ოცნების“ ლიდერები კადრებს წელიწადნახევარი ინახავდნენ. „ანუ, მათ იცოდნენ ამ მძიმე დანაშაულების შესახებ და არ გამოაშკარავეს, ვინაიდან კადრები არჩევნებამდე პოლიტიკური მიზნებისთვის უნდა გამოეყენებინათ. ფაქტობრივად, დანაშაულის თანამონაწილეები იყვნენ,“ - განაცხადა ახალაიამ.