ამერიკული მხარის ინიციატივით სატელეფონო საუბარი შედგა ვლადიმერ პუტინსა და ბარაკ ობამას შორის, - ამის შესახებ კრემლი იტყობინება.

როგორც ოფიციალური მოსკოვის განცხადებაშია აღნიშნული, გრძელდება უკრაინაში კრიზისის სხვადასხვა ასპექტების განხილვა.

კრემლის ინფორმაციით, ვლადიმერ პუტინმა აშშ-ს პრეზიდენტთან საუბრისას ყურადღება გამახვილა კიევის ხელისუფლების უუნარობაზე. მათივე განმარტებით, პუტინმა ხაზი გაუსვა იმ ფაქტს, რომ კიევს არ აქვს სურვილი ალაგმოს ულტრანაციონალისტური და რადიკალური დაჯგუფებები, რომლებიც ქმნიან არასტაბილურ გარემოს და ატერორებენ მშვიდობიან მოსახლეობას, ,,მათ შორის რუსულენოვან ჩვენს თანამემამულეებს“, - ნათქვამი კრემლის განცხადებაში.

ამ კონტექსტში განიხილება უკრაინაში ეუთოს სადამკვირვებლო მისიის გაგზავნა, რომელიც რუსეთს პრეზიდენტის აზრით, მნიშვნელოვანია გაგრძელდეს უკრაინის ყველა რეგიონში.

რაც შეეხება ყირიმის რეფერენდუმს, პუტინმა აქცენტი გააკეთა, რომ რეფერენდუმი შეესაბამებოდა ყველა საერთაშორისო სამართლის ნორმას და გაეროს წესდებას, მათ შორის ითვალისწინებდა კოსოვოს პრეცედენტს. ამასთან, ნახევარკუნძულზე მცხოვრებ მოსახლეობას ჰქონდა თვითგამორკვევისა და თავისუფალი ნების გამოხატვის გარანტირებული უფლება.

რუსეთის სახელმწიფო მეთაურმა აღნიშნა, რომ მიუხედავად განსხვავებული შეფასებებისა, დაუყოვნებლივ უნდა გამოინახოს გზები უკრაინაში სიტუაციის სტაბილიზებისთვის.

თავის მხრივ აშშ-ს პრეზიდენტმა რუსეთის პრეზიდენტს ზამთრის პარაოლიმპიადის წარმატებით ჩატარება უსურვა და მასში მონაწილეებს მიესალმა.

აშშ არ ცნობს რეფერენდუმის შედეგებს, რომელიც კვირას ყირიმში გაიმართა.

"ჩვენ არ ვაღიარებთ" რეფერენდუმს", რომელიც დღეს უკრაინის რეგიონში - ყირიმში გაიმართა. ეს რეფერენდუმი ეწინააღმდეგება უკრაინის კონსტიტუციას. საერთაშორისო თანამეგობრობა არ აღიარებს იმ რეფერენდუმის შედეგებს, რომელიც ჩატარდა ძალადობისა და დაშინების საფრთხის ქვეშ, ასევე რუსეთის სამხედრო ჩარევის შედეგად, რაც არღვევს საერთაშორისო სამართალს " - განაცხადა თეთრი სახლის წარმომადგენელმა.

მან ასევე აღნიშნა, რომ არანაირი გადაწყვეტილება უკრაინის მომავალის შესახებ არ უნდა იქნას მიღებული უკრაინის ხელისუფლების მონაწილეობის გარეშე.

"რუსეთის ქმედებები სახიფათო და ხელს უწყობს დესტაბილიზაციას," - განაცხადა განაცხადი თეთრი სახლის ოფიციალურმა წარმომადგენელმა.