უკრაინული მედიის ცნობით, ყირიმში საარჩევნო უბნებზე ბიულეტენებს რუსეთის მოქალაქეებსაც ურიგებენ. რეფერენდუმში ხმის მიცემისთვის დამზადებულია 1 მილიონ 550 ბიულეტენი.

უკრაინული მედიის ცნობით, ბიულეტენები ურიგდებათ იმ მოქალაქეებსაც, რომლებიც საარჩევნო სიებში არ არიან.

უკრაინული ინტერნეტ გამოცემა ლიგა.ნეტ-ის ინფორმაციით, საარჩევნო უბანზე მისული მოქალაქეები, რომლებიც სიებში არ არიან, შეჰყავთ დამატებით სიებში და ხმის მიცემის უფლებას აძლევენ.

ლიგა.ნეტ-ის ინფორმაციით, სიმფეროპოლში მცხოვრებმა რუსეთის მოქალაქემ ეკატერინა სარგეცკოვამ რამდენიმე დღის წინ მიიღო ბიულეტენი.

„რეფერენდუმი გაიხსნა! მე რუსეთის მოქალაქემ, რომელიც სიმფეროპოლში ვცხოვრობ, მივიღე ბიულეტენი, სადაც ეწერა: „რადგანაც, თქვენ აქ ცხოვრობთ, შეგიძლიათ რეფერენდუმში მიიღოთ მონაწილეობა.“ საარჩევნო უბანზე ქალბატონმა ვერ მნახა ოფიციალურ სიაში, მაგრამ უპრობლემოდ ჩამწერა სხვა სიაში,“ - დაწერა სარგეცკოვამ Facebook-ის საკუთარ გვერდზე.