დათა ახალაიას ადვოკატი მორიგ განცხადებას ავრცელებს

სამართალი - 23:46, 14 Mar, 2014

2488

დათა ახალაიას ადვოკატი ირაკლი ზაქარეიშვილი განცხადებას ავრცელებს. ზაქარეიშვილის თქმით, პროკურატურა ცდილობს, მისი დაცვის ქვეშ მყოფის ახალაიას საქმეში სახაზინო ადვოკატი ჩართოს. აღნიშნულ განცხადებას „ნიუპოსტი“ უცვლელად გთავაზობთ:
"დღეს, 2014 წლის 14 მარტს, დილის 10:45 წუთზე ჩამბარდა დავით ახალაიას ბრალდების დადგენილება №1008605 ე.წ. ნავთლუღის ავტოსადგურში ჩატარებული სპეცოპერაციის საქმეზე. პროკურორმა ამირან გულუაშვილმა დილითვე განმიმარტა, რომ ხსენებულ საქმეზე საქმის მასალების ასლები დაცვის მხარეს გადმომცემდა მეორე დღეს, 2014 წლის 15 მარტს. მიუხედავად აღნიშნულისა, 13:10 წუთზე ჩემი ტელეფონის ნომრიდან - 591300041 - დავუკავშირდი პროკურორ გულუაშვილს და ვკითხე, ხომ არ შეუცვლიათ გადაწყვეტილება და ხომ არ იყო შესაძლებელი დღესვე მიმეღო საქმის მასალების ასლები. პროკურორმა დამიდასტურა, რომ მასალებს მივიღებდი შემდეგი დღისათვის. მიუხედავად აღნიშნულისა, საღამოს დაახლოებით 21:00 საათზე დამიკავშირდა პროკურორი ამირან გულუაშვილი და მომიწოდა, მივსულიყავი თბილისის პროკურატურაში მრავალტომიანი საქმის მასალების ასლების ჩასაბარებლად. მე მას შევახსენე დღევანდელი შეთანხმების შესახებ და განვუცხადე, რომ სამუშაო საათები დასრულებულია, გვიანი საღამოა და მნიშვნელოვანი საპროცესო მოქმედების განხორციელება უნდა მომხდარიყო მომდევნო დღეს, ნებისმიერ დროს სამუშაო საათებში. ამის შემდეგ პროკურორმა შემომთავაზა, რომ ჩემს ფაქტობრივ ადგილსამყოფელზე მოვიდოდა გამომძიებელი და გადმომცემდა საქმის მასალებს. მე შევეცადე ამეხსნა პროკურორისთვის, რომ მასალების გადმობარება საჭიროებს მრავალტომიანი საქმის ფურცლების დეტალურ შედარებას გადმოსაცემ მტკიცებულებათა ნუსხასთან, რაც დიდ დროსა და ენერგიას საჭიროებს და გვიან საღამოს ამ პროცედურის განხორციელება შეუძლებელია. ხსენებული საუბრის შემდეგ მალევე კვლავ დამირეკა პროკურორმა გულუაშვილმა და განმიცხადა, რომ საქმეში ჩაერთვება "სახაზინო ადვოკატი," რომელიც ჩაიბარებს საქმის მასალებს და გააგრძელებს დავით ახალაიას ინტერესების დაცვას. ვინაიდან პროკურატურას ახალაიას წინააღმდეგ მტკიცებულებები არ გააჩნია, პროკურატურა ყველანაირად ცდილობს ჩამომაცილოს საქმეს, მოიწვიოს სახაზინო ადვოკატი და ასეთი სამარცხვინო მანიპულაციებით იოლად გავიდეს ფონს!", - ნათქვამია ზაქარეიშვილი მიერ განცხადებაში.