როლანდ ახალაია - სააკაშვილის წინააღმდეგ ჩვენების მიცემას გვაიძულებენ

სამართალი - 12:01, 14 Mar, 2014

2057

საპარლამენტო უმცირესობის წევრი როლანდ ახალაია, დათა ახალაიასთვის სასჯელის შეფარდებას გამოეხმაურა და განაცხადა, რომ მასზე და მის ოჯახზე ზეწოლა გრძელდება. მისივე განცხადებით, გამოძიებას სურს საქართველოს ექსპრეზიდენტის, მიხეილ სააკაშვილის წინააღმდეგ ახალაიების ოჯახმა ჩვენება მისცეს. დეპუტატის განცხადებითვე, დღევანდელი პროკურატურა მათ ოჯახს ვერ გატეხს, რადგან ახალაიების ოჯახს ღირსება გააჩნია. „ჩემზე მიმდინარეობს პროვოკაციები. რამდენჯერმე დააკავეს ადამიანები, რომ ჩემს წინააღმდეგ გამოეყენებინათ. ეს მდგომარეობა არ წყდება. ამ ყველაფერს ერთი ახსნა აქვს, თუ რატომ კეთდება ეს. ამას იმიტომ აკეთებენ, რომ ჩვენგან გამოეძალათ ჩვენებები სააკაშვილის წინააღმდეგ. დღემდე იმიტომ გვებრძვიან, რომ იქნებ სადმე გავტყდეთ. მინდა, მათ ვუთხრა, რომ მათგან განსხვავებით ჩვენს ოჯახს ის სიმდიდრე გააჩნია, რასაც ღირსება, სამშობლოს სიყვარული და ერთგულება ჰქვია. ისინი ვერ გაგვტეხენ და ვერ გაგვაკეთებინებენ იმას, რაც არ ყოფილა, ვერც მორალურად და ვერც ფიზიკურად ვერ გაგვანადგურებენ, ეს გაითვალისწინოს ივანიშვილმა და მისმა შვილობილმა ღარიბაშვილმა“, - განაცხადა ახალაიამ. როლანდ ახალაია სასამართლოს მიერ მიღებულ გადაწყვეტილებას, პოლიტიკურ გადაწყვეტილებას უწოდებს. “მოსამართლემ დაწერა განაჩენი, რომელსაც მოაწერა ხელი, რომ მან დანაშაული ჩაიდინა, ეს არის პოლიტიკური გადაწყვეტილება და მას არაფერი აქვს საერთო მტკიცებასთან“, - განაცხადა ახალაიამ.

შეგახსნებთ, რომ დღეს კუდის ყოფილ ხელმძღვანელს დათა ახალაიას 3 წლით და 9 თვით თავისუფლების აღკვეთა მიესაჯა. დათა ახალაიას, ოლეგ მელნიკოვს, გერონტი ალანიასა და სოსო თოფურიძეს ბრალად ვანო მერაბიშვილის მეუღლის შეურაცხყოფის გამო პოლიციელის ცემა ედებოდათ.