დონაძე კადრების გადაღებას უარყოფს და პროკურატურის კომპეტენტურობას ხაზს უსვამს

სამართალი - 10:43, 14 Mar, 2014

2093

ე.წ. ნავთლუღის საქმეზე შს სამინისტროს პრესამსახურის ყოფილი უფროსის გურამ დონაძის დაკითხვა პროკურატურაში გვიან ღამით დასრულდა. როგორც დაკითხვიდან გამოსულმა დონაძემ ჟურნალისტებთან საუბრისას განაცხადა, გამოძიებას სერიოზული მტკიცებულებები გააჩნია და იმედს გამოთქვამს, რომ ამ საქმესთან დაკავშირებით სიმართლე მალე დამტკიცდება.
დონაძის განმარტებით, დაკითხვის დროს მასზე არანაირი ზეწოლა არ განხორციელებულა და ყველაფერი კანონიერების ფარგლებში იყო.
"ვერ ვიტყვი, რომ ვინმემ ზეწოლა განახორციელდა ან რაიმე ზედმეტი სიტყვაც კი მაკადრა. ყველაფერი კანონიერი იყო. მინდა ავღნიშნო, რომ პროკურატურა კარგად მომზადებული დავინახე ამ საკითხთან დაკავშირებით, რადგან საკმაოდ პროფესიონალური კითხვები იყო დასმული. ჩემი დაკითხვა დაახლოებით ოთხი საათი გაგრძელდა. ვფიქრობ, რომ გამოძიებას ყველა იმ კითხვაზე ვუპასუხე, რაც მათ აინტერესებდათ. გავრცელდა ინფორმაცია თითქოს ეს ვიდეო მასალა ნავთლუღის სპეცოპერაციის გადავიღე მე, ანუ შსს-ს პრესცენტრმა, ეს ვიდეო კადრები არ არის ჩვენი გადაღებული, არ არის პრესცენტრის ოპერატორების მიერ გადაღებული. ეს კადრები გადაიღო თავად კონსტიტუციური უსაფრთხოების დეპარტამენტმა და მეორე დღეს მე მივიღე გამზადებული მასალა, რომელიც შემდგომ პრესცენტრმა ვალდებულების მხრივ გაავრცელა", - განაცხადა დონაძემ.